Կրկին միջադեպ է գրանցվել հայ-ադրբեջանական շփման գծում: Ինչպես տեղեկացնում է ՀՀ ՊՆ-ն, այսօր ժամը 17-ի սահմաններում հայ-ադրբեջանական շփման գծի հյուսիսարեւելյան հատվածում` Տավուշի մարզի Ճամբարակ գյուղի մերձակայքում, ՀՀ ԶՈՒ ստորաբաժանումները հետ են մղել ադրբեջանական դիվերսիոն հերթական խմբի հարձակումը:
«Ադրբեջանական հերթական արկածախնդրությունը ձախողվել է եւ, ըստ նախնական տվյալների, կրելով կորուստներ, հակառակորդը նահանջել է»,-տեղեկացնում է ՀՀ ՊՆ հաղորդագրությունը:
Ըստ ՊՆ-ի՝ հայկական կողմից զոհեր եւ վիրավորներ չկան:
Հիշեցնենք, որ հունիսի 4-ին, Ադրբեջանական կողմի դեիվերսիոն գործողությունների հետեւանքով հայկական կողմը 3 զոհ եւ 6 վիրավոր էր տվել, որին հետեւել էր եւս մեկ ռազմական գործողություն: Այս անգամ, ըստ ադրբեջանական լրատվամիջոցներին զոհվել էր 5 ադրբեջանցի: Երեկ եւ այսօր կրկին սահմանամերձ շրջաններում շարունակվել են կրակահերթերը:
ԱՄՆ պետքարտուղար Հիլարի Քլինթոնը հունիսի 4-ին մեկնարկած տարածաշրջանային այցելության շրջանակներում, Հայաստանից հետո այցելել է նաեւ Ադրբեջան, ուր խոսել է նաեւ վերջին օրերին սահմանին տիրող իրավիճակի մասին:
«Ես շատ մտահոգ եմ դրանից և չեմ ցանկանում, որ լարվածությունն աճի: Անհրաժեշտ է դադարեցնել արյունահեղությունը: Պետք է համատեղ աշխատել՝ հրադադարի ռեժիմը պահպանելու համար», – հայտարարել է Հիլլարի Քլինթոնը:
© Medialab.am
