ԱԳ նախարարի տեղակալ Ավետ Ադոնցի հանդիպումը Հայաստանում Հնդկաստանի դեսպան Կիշան Դան Դեվալի հետ

Հեղինակ MediaLab

Մայիսի 14-ին ՀՀ ԱԳ նախարարի տեղակալ Ավետ Ադոնցն ընդունեց Հայաստանում Հնդկաստանի դեսպան Կիշան Դան Դեվալին (Kishan Dan Deval):

Կողմերը գոհունակություն հայտնեցին երկկողմ բարեկամական հարաբերությունների բարձր մակարդակի կապակցությամբ՝ այդ համատեքստում առանձնապես կարևորելով նոր տիպի կորոնավիրուսի դեմ պայքարի շրջանակներում հաստատված սերտ համագործակցությունը: Անդրադարձ կատարվեց նաև երկու երկրների քաղաքացիների իրենց հայրենիք վերադարձի կազմակերպման ուղղությամբ ձեռնարկվող քայլերին:

Դեսպանը փոխանցեց Հնդկաստանի կառավարության կողմից Covid-19 համավարակի դեմ պայքարի շրջանակներում Հայաստանին տրամադրված և աշխարհում այսօր մեծ պահանջարկ ունեցող Հիդրոքսիքլորիքին դեղամիջոցի խմբաքանակը՝ նախատեսված շուրջ 5000 պացիենտի բուժման համար:

Հանդիպման ընթացքում անդրադարձ կատարվեց տարբեր ոլորտներում համագործակցության հարցերի լայն շրջանակի:

Կողմերն անդրադարձ կատարեցին տարածաշրջանային խնդիրներին՝ ընդգծելով միմյանց համար կարևորություն ունեցող հարցերում առկա փոխադարձ ըմբռնումն ու աջակցությունը:

Այս մասին տեղեկացնում է ՀՀ արտաքին գործերի նախարարությունը։