Հայաստանում մեկ օրվա ընթացքում կորոնավիրուսի 771 դեպք է հաստատվել, 502 քաղաքացի ծանր վիճակում է, իսկ 11-ը՝ ծայրահեղ ծանր։ Այս պահի դրությամբ թոքերի արհեստական օդափոխության սարքերին միացված է 42 քաղաքացի, կառավարության նիստում տեղեկացրել է Առողջապահության նախարար Արսեն Թորոսյանը։
«Երեկ ունեցել ենք վատ իմաստով ռեկորդային բացարձակ թիվ՝ 771 նոր դեպք՝ 2336 թեստավորումից։ Իրավիճակը մնում է թեկուզ կայուն, բայց լարված», -հայտարարել է Արսեն Թորոսյանը։
Նրա ներկայացմամբ, հոսպիտալիզացիայի վիճակը բարվոք է և առավոտյան ժամը 9։00-ի դրությամբ կորոնավիրուսային հիվանդությամբ 51 քաղաքացի կարիք է ունեցել հիվանդանոց տեղափոխման, որոնցից ընդամենը 2-ն են գտնվում տանը։ «Այսինքն՝ մնացած 49-ը գտնվում են այլ հիվանդանոցային հաստատություններում։ Այս պրոցեսը ընթացքի մեջ է՝ մարդիկ դիմում են, նրանց մոտ հաստատվում է, տեղափոխվում են համապատասխան հիվանդանոցներ։ Այս իմաստով իրավիճակը լավ է», -ասել է նախարարը։
Նրա փոխանցմամբ, բոլոր հիվանդանոցների վերակենդանացման բաժանմունքներում մի քանի ազատ տեղեր կան, բայց դա շատ հարաբերական է, քանի որ շատ արագ այդ մահճակալները համալրվում են։
Տեսանյութը՝ Factor.am-ի