Հուլիսի 1-ին Հիվանդությունների վերահսկման և կանխարգելման ազգային կենտրոնը հրապարակել է Գորիսի Ֆրանս-հայկական սրտանոթային կենտրոնի բոլոր աշխատողների Covid-19 ՊՇՌ թեստերի պատասխանները, որի համաձայն, բոլոր արդյունքները բացասական են:
Կենտրոնը վերսկսում է իր աշխատանքը Սյունիքի մարզի և Արցախի սուր սրտային խնդիրներ ունեցող բոլոր հիվանդների համար՝ թույլ չտալով կորցնել սրտամկանի վնասումը կանխող թանկարժեք ժամանակը:
Գորիսի Ֆրանս-հայկական սրտանոթային կենտրոնը գործում է ՀՀ առողջապահության նախարարության և ՀՀ պարետատան բոլոր սանիտարահամաճարակաբանական ցուցումներին համապատասխան: Սակայն այս օրերին, հիվանդների անվտանգությունից ելնելով, կենտրոնը հարկադրված դադարեցրել էր իր աշխատանքը, քանի որ բուժանձնակազմը շփում էր ունեցել հաստատված վարակակրի հետ, որից հետո բոլոր կոնտակտավոր աշխատակիցներն ինքնամեկուսացվել էին:
Այս մասին տեղեկացնում է Գորիսի Ֆրանս-հայկական սրտանոթային կենտրոնը: