ՀՀ նախագահի թեկնածու, ԱԺ պատգամավոր Հրանտ Բագրատյանը այցելեց Գյումրի քաղաք: Պարոն Բագրատյանը լրագրողների և Գյումրիի բնակիչների հետ հանդիպեց «Հոկտեմբեր» կինոթատրոնի սրահում:
Հրանտ Բագրատյանը նախ պատասխանեց լրագրողների բազմազթիվ հարցերին: Անդրադառնալով Սերժ Սարգսյանի` «Գալա» հեռուստաընկերությանը տված հարցազրույցին, Բագրատյանն ասաց. «Իրականության մեջ նա ձայներ չունի: Նա հինգ տարի ձախողել է, նրա կատարած գործը լավը չէ, եւ ես ասում եմ՝ ընտրե՛ք ինձ, եւ ես ձեզ կոնկրետ ցույց կտամ ճիշտ ճանապարհը»:
Անդրադառնալով սոցիոլոգիական հարցումներին Հրանտ Բագրատյանը հայտարարեց, որ դրանք պատվիրված են իշխանությունների կողմից: Նա նշեց, որ ինտերնետային կայքերում անցկացվող սոցիոլոգիական հարցումներում Սերժ Սարգսյանի վարկանիշը 8-10 տոկոսից չի անցնում: Շարունակելով սոցոլոգիական հարցումների թեման Բագրատյանն ասաց. «Պետությունը հայտարարում է, որ 30 տոկոս աղքատություն ունենք, մենք Գյումրիում 47 տոկոս աղքատություն ունենք, պատկերացնո՞ւմ եք, որ էստեղ՝ Գյումրիում, ուր յուրաքանչյուր 2-րդ մարդը աղքատ է, 70 տոկոս Սերժը քվե տանի… Սա նշանակում է, որ անբարո ձևով Հայաստանում փող են աշխատում: «Գելափ», «Եվրոպայի բարեկամներ»՝ իրանց մարդիկ են, իշխանությունների վճարած: Իրենց ասելով՝ աղքատներն էլ են ասում, որ կընտրեն Սերժ Սարգսյանին»: Նախագահի թեկնածուն ասաց, որ իրականում Սերժ Սարգսյանը վարկանիշով երրորդ տեղն է զբաղեցնում:
Այնուհետև Հրանտ Բագրատյանը զրուցեց դրսում խմբված գյումրեցիների հետ: Անդրադարձավ ավանդների վերադարձի խնդրին: Գյումրեցիներին հետաքրքրում էին նաև մաքսատան անցկացվող բարեփոխումների, մենաշնորհների վերացման խնդիրները: Հրանտ Բագրատյանը նշեց, որ միայն իր ծրագրում կա այլընտրանքային առաջարկ` մասնավոր մաքսատուն բացելու գաղափարը:
Այնուհետև Հրանտ Բագրատյանը ոտքով շրջեց քաղաքում և մտավ եկեղեցի:
Հաջորդ կանգառը ժուռնալիստների Ասպարեզ ակումբն էր, որտեղ հարցազրույց եղավ Գյումրիի մտավորականության ներկայացուցիչների հետ: Հրանտ Բագրատյանը պատասխանեց նրանց հարցերին, ներկայացրեց Հայաստանի զարգացման իր տեսլականը:
