«Ֆիլմ + H20» կինո-մրցույթի հաղթանակած ռեժիսորը կմեկնի Միացյալ Թագավորություն` մասնակցելու Sheffield Doc/Fest 2013 ամենամյա փառատոնին, ուր հնարավորություն կունենա հետևելու փառատոնի ծրագրին և անգլիացի ռեժիսորների հետ քննարկելու համագործակցության հնարավորությունները: 1994 թվականից ի վեր անցկացվող փառատոնը միայն ֆիլմերի ցուցադրման վայր չէ, այլ կրթական և համագործակցային հնարավորությունների ստեղծման միջազգային հարթակ:
«Ֆիլմ + H20» մրցույթին հայ ռեժիսորների ներկայացրած աշխատանքներից նախնապես ընտրվել էր ինը կարճամետրաժ ֆիլմ: Կինո-մրցույթը հայտարարվել էր ամիսներ առաջ և նվիրված էր Բրիտանական ֆիլմերի 11-րդ փառատոնի` «Ջրային համագործակցության» թեմային: Մրցույթի նպատակն էր ֆիլմերի միջոցով բարձրաձայնել հասարակությունում առկա ջրի հետ կապված խնդիրներն ու մտահոգությունները:
«Հայ ռեժիսորների աշխատանքները ներկայացնում են ջրի սակավության արդյունքում առաջացած խնդիրները, դրանց լուծման իրենց տեսլականն ու մոտեցումները: Խնդրի բացահայտման ռեժիսորների նախընտրած ուղղություններն էլ են տարբեր` պարզ, մարդկային պատմություններից մինչև փոխաբերություն»,-նշեց Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:
«Փառատոնի էկոլոգիական թեման համահունչ է «ՎիմպելԿոմ» ընկերությունների խմբի սոցիալական ռազմավարությանը: Բջջային կապի ծառայությունների ընկալումն ինքնին ենթադրում է հոգատար վերաբերմունք բնական պաշարների հանդեպ: Beeline ծառայությունների շնորհիվ մենք հնարավորություն ունենք օտագործել քիչ քանակությամբ թուղթ, թանաք, քիչ երթևեկել տրանսպորտով` չաղտոտելով շրջակա միջավայրը, և այդ ամենի հետ մեկտեղ ստանալ ավելի շատ շփում և դրական էմոցիաներ: Ունենալով նման առաջարկներ, մենք ցանկանում ենք լինել օգտագար հասարակությանը և այդ իսկ պատճառով որոշեցինք աջակցել Բրիտանական ֆիլմերի 11-րդ փառատոնի անցկացմանը, որն ուղղված է ոչ միայն մշակույթների սերտացմանը, այլ նաև մեծապես աջակցում է շրջակա միջավայրի պահպանմանը»,- նշեց «ՎիմպելԿոմ» ընկերությունների խմբի, ԱՊՀ երկրներում Հասարակայնության հետ կապերի վարչության ղեկավար Արտյոմ Մինաևը:
Բացի առաջին մրցանակակրից, ով կարժանանա գլխավոր մրցանակին, այն է` այցելություն Sheffield Doc/Fest 2013 փառատոն, մրցույթի հայ-բրիտանական հեղինակավոր ժյուրին ընտրել է նաև երկրորդ և երրորդ տեղի հաղթողներին: Իսկ ԱրմենՏել ՓԲԸ-ն կպարգևատրի «YouTube Winner» անվանակարգի հաղթողին: Այս անվանակարգի հաղթողը պետք է հավաքեր առավելագույն քանակությամբ հավանություն` britfilms.am կայքում կազմակերպված քվեարկության արդյունքում:
«Ֆիլմ + H20» մրցույթին ներկայացված ֆիլմերը հնարավոր է դիտել Բրիտանական խորհրդի Յութուբյան էջում` http://www.youtube.com/BCArmenia և www.britfilms.am կայքում:
Այս մասին տեղեկացնում է Բրիտանական խորհրդի պաշտոնական հաղորդագրությունը:
© Medialab.am
