Հայրենական հեռուստաընկերություններից մեկի եթերում հարց է հնչում, կամ տեսակետ-մեկնաբանություն, թե այդ ինչ որակ ունի ադրբեջանական գերզինվող բանակը, եթե հայաստանցի 77-ամյա ծերունին անարգել հատում է Ադրբեջանի սահմանը:
Հայկական հեռուստաեթերում երբեք չի հնչի հարց, թե Տավուշի մարզում դեռ քանի բնակիչ պետք է մոլորվի եւ հայտնվի ադրբեջանական դիրքերում, որպեսզի այդ հատվածում ձեռնարկվեն հայաստանցիների մոլորվելու վտանգները կանխող խիստ միջոցառումներ:
Երբ Հայաստանի սահմանին ադրբեջանական դիվերսիայից կամ դիպուկահարի կրակոցից մի զինվոր է զոհվում, հայկական կողմը խրոխտ հայտարարում է պատասխանի եւ հատուցման մասին, հաճախ նույնիսկ վրեժ բառն օգտագործում: Բայց կրկին՝ չի հնչում հարցադրում, թե արդյոք սահմանին արվում է հնարավորը, զինվորների անվտանգության բարձր մակարդակ ապահովելու համար:
Անշուշտ, ամեն հայ զինվորի կյանքի դիմաց հակառակորդին պետք է ստիպել հատուցել հնարավորինս շատ: Բայց, առաջին հերթին դա ոչ թե վրեժխնդրության ակտ պետք է լինի, այլ մարտական գործողություն, որն ունի հստակ նպատակներ ու թիրախներ եւ «վրեժի» փոխարեն, այդ գործողությամբ պետք է առաջնային լինեն հնարավորինս հեռանկարային խնդիրների լուծումներ:
Դրանից բացի, եթե օրինակ որեւէ մեկին թվում է, որ հայ մեկ զինվորի կյանքի դիմաց ադրբեջանցիների թեկուզ տասնյակ կյանքը դույզն իսկ մտահոգելու է Ալիեւին, ապա մեղմ ասած մոլորություն է: Հետեւաբար, թշնամուն կամ հակառակորդին հատուցում պարտադրելուց բացի, պետք է մտածել հայ զինվորի, սահմանամերձ բնակավայրերի անվտանգությունը բարձրացնելու մասին:
Ինչպես լուծել այդ հարցը, երբ կա զինծառայողների թվաքականի, նաեւ իհարկե պրոֆեսիոնալիզմի խնդիր, քանի որ բոլորը չէ, որ կարող են լինել սահմանի բարդ հատվածների արդյունավետ պահապաններ:
Հայաստանում կան հարյուրավոր, հազարավոր ազատամարտիկներ, Արցախի պատերազմի մասնակիցներ, որոնք գտնվում են նյութական շատ ծանր վիճակում: Նրանցից շատերն իհարկե բավական տարիքով են, սակայն պատերազմական փորձն այնպիսին է, որ նրանք կարող են «մրցունակ» լինել գրեթե անփորձ զորակոչիկների համեմատ:
Ինչու՞ նրանց չներգրավել սահմանների պաշտպանության գործընթացի մեջ, ինչը միաժամանակ կօգնի թե անվտանգության մակարդակի բարձրացմանը, թե նաեւ այդ մարդկանց սոցիալական ծանր խնդիրների լուծմանը: Կարդալ ավելին