Նյու Յորքում խուճապ Է տիրում, կորոնավիրուսի պատճառով մարդիկ, մեծ հերթեր կանգնելով, գնում են ձեռքերի հականեխիչներ, մաքրող միջոցներ, ջուր եւ առաջին անհրաժեշտության իրեր, իսկ աշխարհում ամենամարդաշատ հրապարակներից մեկը՝ Times Square-ն, աչքի առաջ դատարկվում Է, տեղեկացնում Է «Արմենպրես»-ը՝ հղում անելով «Ինտերֆաքս»-ին:
COVID-19 վիրուսի տարածման հանդեպ վախն ամերիկացիներին հարկադրել Է ուտելիքի եւ ջրի պաշար տեսնել, գնել դիմակներ, ձեռքերի հականեխիչներ, զուգարանի թուղթ եւ դեղորայք:
«Շատ մարդիկ սկսում են անհանգստանալ, որ համաճարակի դեպքում առաջին անհրաժեշտության ապրանքները վաճառված կլինեն: Կորոնավիրուսի հանդեպ վախը յուրատեսակ խելացնորություն Է առաջացրել մեծ խանութներում»,- գրում են թերթերը:
Ամերիկացիներն ամեն օր սոցիալական ցանցերում զետեղում են ջրի եւ հականեխիչների դատարկ դարակների նկարներ խոշոր ցանցերի խանութներում, ներառյալ Costco-ն, Walmart-ը, Target-ը եւ Home Depot-ը եւ երկար հերթեր ինչպես խանութների ներսում, այնպես Էլ դրսում:
Վերջին ժամանակներս ամերիկացիներից բազմաթիվ գանգատներ են ստացվում դիմակների եւ հականեխիչների բարձրացված գների համար, ըստ որում որոշ գնորդներ պատրաստ են ավելի շատ վճարել, որպեսզի գնեն առկա ապրանքները:
New York Post-ի տվյալներով՝ վիրուսից պաշտպանության ապրանքների առցանց-վաճառքները վերջին երկու ամսում բարձրացել են 817 տոկոսով: Նյու Յորքի նահանգապետ Էնդրյու Քուոմոյի հաղորդմամբ՝ նահանգում կորոնավիրուսով հիվանանալու դեպքերի թիվը հասել Է 105-ի: Մարտի 7-ին Քուոմոն հայտարարել Է նահանգում արտակարգ դրություն սահմանելու մասին:
