Աշխարհասփյուռ հայությունը, մեկ բռունցք դարձած, զինվորագրվել է Արցախի պաշտպանության սուրբ գործին. Հրանուշ Հակոբյան

Հեղինակ MediaLab

Սփյուռքի նախկին նախարար Հրանուշ Հակոբյանը հանդես է եկել հայտարարությամբ․

Սիրելի՛ հայրենակիցներ, տարբեր պետություններում ապրող թանկագի՛ն քույրեր եւ եղբայրներ, վտանգված է հող հայրենին, օրեր շարունակ վասն հայրենյաց կենաց-մահու պայքար են մղում հայ զինվորներն ու սպաները, իրենց հուժկու եւ դիպուկ հարվածներով կանխում են թշնամու առաջխաղացումը` դրսեւորելով հերոսության եւ անձնազոհության հոգեցունց օրինակներ:

Աշխարհասփյուռ հայությունը, մեկ բռունցք դարձած, զինվորագրվել է Հայոց բանակին, Արցախի պաշտպանության սուրբ գործին եւ աշխարհից պահանջում է միջամտել թուրք-ադրբեջանական ահաբեկչական տանդեմի սանձազերծած պատերազմին, ի դերեւ անել հայկական պատմական հողի, Հայոց երկրորդ պետության նկատմամբ նրանց նորօսմանական նկրտումները:

Երախտապարտ եմ ձեզ, սիրելի՛ հայրենակիցներ, որ դուք ձեր բնակության երկրներում դուրս եք եկել աննահանջ պայքարի եւ օրեր շարունակ ձեր ցույցերով, միտինգներով, երթերով, արդարացի պահանջներով ուժ եք հաղորդում Հայոց բանակին, մեր Հայրենիքին, մեր չքնաղ Արցախին եւ աշխարհին ցույց եք տալիս հայի ուժը, տաղանդը եւ համախմբվածությունը Հայրենիքի շուրջ:

Դիմելով Ձեզ` սիրելի՛ երիտասարդներ, մեր ազգասե՛ր եւ հայրենասե՛ր հայրենակիցներ, խնդրում եմ, որ ձեր ուժն ու կարողությունները, ունեցած կապերն ու հնարավորությունները, տաղանդն ու ազդեցությունը օգտագործեք եւ բանակցեք ձեր բնակության երկրների պետական, նահանգային, քաղաքային իշխանությունների հետ, հորդորեք եւ պահանջեք.

1. Ճանաչել միջազգային իրավունքի հիմնարար սկզբունքներին համապատասխան ինքնորոշված Արցախի Հանրապետության անկախությունը:

2. Օր առաջ հաստատել հրադադար եւ կանգնեցնել սոսկալի ողբերգությունը:

3. Ձեռնարկել միջոցներ` զանգվածային լրատվության բոլոր միջոցներով միջազգային հանրությանը տեղեկացնելու դարեր շարունակ իր հողում ապրելու եւ արարելու` Արցախի բնակչության բնական իրավունքի մասին, բացատրելու, որ արհեստականորեն ստեղծված Ադրբեջանը որեւէ իրավունք չունի Արցախի նկատմամբ, եւ Արցախը երբեք չի լինելու Ադրբեջանի կազմում, հիշեցնելու Թուրքիայի կողմից Հայոց ցեղասպանության մասին:

4. Կիրառել տարբեր սանկցիաներ Թուրքիայի եւ Ադրբեջանի նկատմամբ, նրանց հեռացնել միջազգային կազմակերպություններից, դադարեցնել երկկողմ եւ բազմակողմ պայմանագրերը, համաձայնագրերը` հատկապես, եթե դրանք վերաբերում են սպառազինությունների վերահսկմանն ու կանխմանը:

Աշխարհը պետք է իմանա, որ նրանք պատերազմական հանցագործներ են, որոնք անկարող լինելով հաղթահարել Հայոց անպարտելի բանակի, մեր հերոս որդիների դիմադրությունը եւ խախտելով միջազգային մարդասիրական իրավունքի նորմերը, հրթիռակոծում են Ստեփանակերտն ու Շուշին, թիրախ դարձնում քաղաքացիական խաղաղ բնակչությանը, կանանց ու երեխաներին, ծերերին եւ հիվանդներին, սպանում անմեղ ու անզեն մարդկանց, փորձում շարունակել իրենց ցեղասպան քաղաքականությունը:

Քսանմեկերորդ դարում առաջադեմ աշխարհը պետք է վճռականորեն կանխի խաղաղության եւ մարդկության անվտանգության դեմ ուղղված ծանրագույն հանցագործության` ցեղասպանության եւ հայրենազրկման կրկնությունը, հանուն որի այսօր անձնազոհաբար մարտնչում են հայ զինվորն ու կամավորը:

Երկյուղածորեն գլուխ եմ խոնարհում դեպ հավերժություն գնացած եւ անմահացած մեր հերոսների հիշատակի առջեւ:

Երախտագիտություն եմ հայտնում հանուն հայրենիքի մարտնչող հայ զինվորին ու հրամանատարին:

Քրիստոնեական արժեքներ որդեգրած հայ բիբլիական ժողովուրդը հաղթելու է մեզ պարտադրված հայրենական պատերազմում եւ շարունակելու է հավերժի ճամբորդի իր արժանապատիվ երթը, քանզի մեր պայքարն արդար է, մենք անպարտ ենք մեր ազգային միասնությամբ ու հայրենասիրությամբ, մեր երազանքն իրականացնելու անկոտրում կամքով եւ վճռականությամբ:

Անխորտակ է Հայոց ԲԱՆԱԿԸ,

Հավերժ է ԱՐՑԱԽԸ,

Հզոր է ՍՓՅՈՒՌՔԸ,

Սուրբ է ՀԱՅՐԵՆԻՔԸ,

Անպարտ է ՀԱՅԻ ոգին:

ՀՐԱՆՈՒՇ ՀԱԿՈԲՅԱՆ