Մեր բարեկամ իսլամադավան ազգերին կոչ ենք անում չտրվել ադրբեջանական կեղտոտ սադրանքներին․ Էդմոն Մարուքյան

Հեղինակ MediaLab

Ազգային ժողովի Լուսավոր Հայաստան խմբակցության ղեկավար Էդմոն Մարուքյանը իր ֆեյսբուքյան էջում գրում է․

Ադրբեջանն Արցախյան առաջին պատերազմի ընթացքում փորձել է այն դարձնել կամ ներկայացնել որպես կրոնական պատերազմ, որպեսզի կարողանա դրանում մեր դեմ ներգրավել իսլամ դավանող տարբեր ազգերի, ինչը նրան չի հաջողվել։

Ադրբեջանական կողմը նույնը ցանկանում է անել Արցախյան այս պատերազմի ժամանակ՝ այս օրերին՝ փորձելով իսլամադավան այլ պետությունների կոալիցիա ստեղծել մեր դեմ, բայց դա նրան չի հաջողվել և միևնույն է չի հաջողվելու։ Հայերը, լինելով քրիստոնեությունը պետականորեն առաջինն ընդունած ժողովուրդ, եղբայրական հարաբերություններ են ունեցել և այժմ էլ ունեն բազմաթիվ իսլամ դավանող ժողովուրդների ու պետությունների հետ։

Հայ ժողովուրդը շարունակելու է իր բարեկամական հարաբերություններն այդ բոլոր երկրների հետ։ Մեր բարեկամ իսլամադավան ազգերին կոչ ենք անում չտրվել ադրբեջանական կեղտոտ սադրանքներին։