Այսօր Ընդդեմ կանանց նկատմամբ բռնության կոալիցիայի անդամները հանդիպել են ՀՀ ԱԺ պետական-իրավական մշտական հանձնաժողովի նախագահ Հովհաննես Սահակյանի (ՀՀԿ) եւ հանձնաժողովի անդամ, ԱԺ ՀՀԿ խմբակցության պատգամավոր Արփինե Հովհաննիսյանի հետ:
Հանդիպման նպատակը հանձնաժողովին ներկայացված «Ընտանեկան բռնության կանխարգելման մասին» օրենքի նախագծի քննարկումն էր: Հանձնաժողովի նախագահը շեշտեց, որ ընտանեկան բռնության խնդիրը մտահոգում է իրենց եւ իրենք պատրաստ են օրենսդրական քայլեր ձեռնարկելու՝ հանուն բռնության կանխարգելման: Պատգամավորները, սակայն, որոշ վերապահումներ ունեն նախագծի մեջ ներառված մի շարք դրույթների վերաբերյալ:
ԱԺ պատգամավորների եւ կոալիցիայի անդամների միջեւ ձեռք բերվեց համաձայնություն, որի ընթացքում Կոալիցիան պետք է ներկայացնի օրենքի նախագծի հայեցակարգը՝ ՀՀ ԱԺ պետական-իրավական մշտական հանձնաժողովում նախագիծը քննարկելու եւ համատեղ աշխատանք տանելու համար:
Հիշեցնենք, որ հոկտեմբեր ամսվա ընթացքում Ընդդեմ կանանց նկատմամբ բռնության կոալիցիան ստորագրահավաք էր իրականացրել, որին միացել էին 2000-ից ավելի քաղաքացիներ: Քաղաքացիները բացիկներ էին ուղարկել ԱԺ պետական-իրավական մշտական հանձնաժողովին`պահանջելով ընդունել «Ընտանեկան բռնության կանխարգելման մասին» օրենք:
Նոյեմբերի 25-ին Կոալիցիան օրենքի նախագիծը ներկայացրել էր Ազգային Ժողովի 131 պատգամավորներին, ինչպես նաեւ նախագծի քննարկման համար առանձին հանդիպում խնդրել: Նշենք, որ բացի ՀՀԿ խմբակցության պատգամավորներից Կոալիցիայի անդամների հետ հանդիպելու ցանկություն են հայտնել նաեւ ԲՀԿ, Ժառանգություն եւ ՀԱԿ խմբակցության պատգամավորները: Վերջիններիս հետ հանդիպումները տեղի կունենան այս շաբաթվա ընթացքում:
Այս մասին տեղեկացնում է կոալիցիայի մամլո հաղորդագրությունը:
