Արցախի ԱԺ նախկին պատգամավոր, «Միացյալ Հայաստան» կուսակցության նախագահ Վահան Բադասյանը կալանավորվել է: Որոշումը կեսգիշերն անց հրապարակել է Երևան քաղաքի ընդհանուր իրավասության դատարանը՝ բավարարելով ԱԱԾ քննիչի միջնորդությունը:
Բադասյանը մեղադրվում է Քրեական օրենսգրքի 301-րդ հոդվածի հատկանիշներով (իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչեր հնչեցնելը):
Ավելի վաղ Բադասյանի փաստաբանը հայտնել էր, որ իրենք չեն ընդունում մեղադրանքը, ավելին՝ դրանում քաղաքական ենթատեքստ է տեսնում:
Հիշեցնենք՝ Վահան Բադասյանը «Եռաբլուր» պանթեոնում հայտարարել էր, թե կազմակերպելու է ՀՀ վարչապետ Նիկոլ Փաշինյանին զենքով ֆիզիկապես վերացնելու գործընթաց:
