Ուռուցքաբանության ազգային կենտրոնի տնօրեն Նարեկ Մանուկյանը ներկայացրեց կենտրոնի երեք հիմնական ստրատեգիական ուղղությունները, որով փորձում են հիվանդանոցի մատուցած ծառայությունների մակարդակը մի քանի անգամ բարձրացնել։
«Առաջինը՝ կենտրոնի կենցաղային պայմանների բարելավումն է ժամանակակից ստացիոնար բաժանմունքներին բնորոշ։ Շենքում կան բազմաթիվ բաժանմունքներ, որոնք 80-ական թվականներին կառուցվելուց հետո չեն վերանորոգվել։
Երկրորդը՝ կենտրոնը համալրել աշխարհում լավագույն սարքավորումներով։ Կենտրոնը ձեռք է բերել մոտ 23 նոր տեսակի սարքավորումներ։
Երրորդ կարևոր ուղղությունը՝ մասնագետների վերապատրաստումն է արտասահմանում։ Անցած տարվա ընթացքում համավարակով պայմանավորված խնդիրներ կային արտասահման մեկնելու հետ կապված։ Հուսով եմ, այս տարի այդ խնդիրները կվերանան և ամբողջ բուժանձնակազմը երկարատև վերապատրաստում կանցնի արտասահմանյան լավագույն կլինիկաներում»,- «Արմենպրես»-ի հետ զրույցում ասաց Նարեկ Մանուկյանը։
Անդրադառնալով բուժհիմնարկներում տարածված ստվերային շրջանառությանը՝ կենտրոնի տնօրենը ընդգծեց, որ այս երևույթի դեմ լրջագույն պայքար է մղվում իր և ղեկավար անձնակազմի կողմից։ Մյուս կողմից, ըստ Մանուկյանի, բարձրացվում են բժիշկների աշխատավարձները, որը ևս այդ երևույթի վերացման խթան է հանդիսանում։
« Ստվերային շրջանառությունը բուժհիմնարկներում տգեղ երևույթ է և թողնելով բուժական միջոցառումները կենտրոնանում ենք այդ երևույթի դեմ։ Այդ երևույթը պետք է արմատախիլ արվի բոլոր բուժհիմնարկների կողմից»,- եզրափակեց Մանուկյանը։