ՀՀ արտակարգ իրավիճակների նախարարի հանձնարարականով՝ Երևանի և մարզային փրկարարական վարչությունների ծառայողները շարունակում են հանրապետության տարբեր դպրոցներում և բնակավայրերում «Ազդարարում, տարահանում, պատսպարում» թեմայով միջոցառումների իրականացումը:
ՀՀ ԱԻՆ լրատվական ծառայությունից տեղեկացնում են, որ Շիրակի մարզի Մարմաշեն համայնքի Շիրակ բնակավայրում և բնակավայրի միջնակարգ դպրոցում մարզային փրկարարական վարչության կողմից անցկացվել է ուսումնավարժություն՝ «Պատսպարման կազմակերպումը «Օդային տագնապ» ազդանշանի դեպքում» թեմայով:
Ուսումնավարժության ընթացքում փորձարկվել է Շիրակ բնակավայրի էլեկտրաշչակը. այն գտնվել է սարքին վիճակում: Էլեկտրաշչակի ազդարարման արդյունքում իրականացվել և կազմակերպվել է նշված բնակավայրի միջնակարգ դպրոցի մանկավարժական անձնակազմի և աշակերտների տարահանում և պատսպարում դպրոցի նկուղում:
Ուսումնավարժության ավարտից հետո բնակավայրի վարչական ղեկավար կազմի հետ իրականացվել է բնակելի տների նկուղների պատրաստվածության վիճակի ուսումնասիրություն, տրվել են համապատասխան ցուցումներ:
Հատուկ տակտիկական ուսումնավարժություն է անցկացվել նաև Վայոց ձորի մարզի Գլաձոր բնակավայրի միջնակարգ դպրոցում: Վայոց ձորի մարզային փրկարարական վարչության ներկայացուցիչներն ուսումնավարժության ավարտից հետո առանձնացրել են թերությունները, տվել խորհուրդներ՝ պատրաստվածության մակարդակը բարձրացնելու ուղղությամբ:
