Արտակարգ իրավիճակների պետական ծառայության տնօրեն գնդապետ Մեխակ Արզումանյանի նախաձեռնությամբ, վերսկսվել է դպրոցականների հետ տարվող «Պատանի փրկարար» ամենամյա ծրագիրը:
Միջոցառումներում ներառված են փրկարարական և առաջին բուժօգնության հմտությունների ու կարողությունների, ինչպես նաև ընդհանուր գիտելիքների ցուցադրում: Ծրագրի առաջին փուլում մասնակցել են Ստեփանակերտի 1-ին, 2-րդ և 4-րդ դպրոցների 3 հավաքական թիմերը, որոնցից յուրաքանչյուրը զինղեկներից բացի, ունի նաև թիմի ավագ:
Ծրագրի մասնակիցների ողջունել է ԱԻ պետական ծառայության տնօրեն գնդապետ Մեխակ Արզումանը և կարևորել նմանատիպ մարզական-մանկապատանեկան միջոցառումների անցկացումը, պատանի փրկարարներին մաղթել հաջող և արդյունավետ մրցումներ:
Առաջիկայում մրցումներն անց են կացվելու տարբեր ձևերում. պտտաձողի վրա, փոխանցումավազք, մարտական հագուստ-հանդերձանքի կրում և համալիր այլ վարժություններ:
Ավանդական դարձած «Պատանի փրկարար» ծրագիրը նպատակ ունի նոր սերնդի մոտ հասարակական և անձնական անվտանգության նկատմամբ ձևավորել պատասխանատու և գիտակից վերաբերմունք, փրկարարական աշխատանքի վերաբերյալ ստանալ գործնական գիտելիքներ և էքստրեմալ իրավիճակներում ճիշտ կողմնորոշվելու համար անհրաժեշտ հմտություններ:
Պարապմունքների վերջում ամփոփվելու են արդյունքները, որից հետո հավաքական թիմերի միջև անց է կացվելու առաջնություն: Համապատասխանաբար առաջին տեղերը զբաղեցնող թիմերը կարժանանան պարգևների:
Այս մասին տեղեկացնում են ԱՀ Արտակարգ իրավիճակների պետական ծառայությունից։
