Ղազախստանի Ակտոբեի մարզում ՀՀ պատվավոր հյուպատոս Հայկ Տերտերյանի գործին վերաբերող պարզաբանումները կտրվեն դատական գործընթացի ավարտից հետո: Ինչպես տեղեկացնում է «Արմենպրես»-ը, այս մասին հաղորդագրություն է տարածել Ղազախստանում ՀՀ պատվավոր հյուպատոսի գրասենյակը:
«Ղազախստանում ՀՀ պատվավոր հյուպատոսի գրասենյակը Ակտոբեի մարզում ՀՀ պատվավոր հյուպատոս Հայկ Տերտերյանի նկատմամբ սահմանված տնային կալանքի առնչությամբ հայտնում է, որ դատական գործի քննությունը, որը վերաբերում է պատվավոր հյուպատոսի անձնական տնտեսական գործունեությանը, գտնվում է ընթացքի մեջ: Գործին վերաբերող պարզաբանումները կտրվեն դատական գործընթացի ավարտից հետո»,- նշված է հաղորդագրության մեջ:
Ավելի վաղ, ղազախական լրատվամիջոցները հայտնել էին, որ Ղազախստանի Ակտոբեի մարզում ՀՀ պատվավոր հյուպատոս Հայկ Տերտերյանին մեղադրում են բնապահպանական օրենսդրությունը խախտելու մեջ:
