Գեղարքունիքի մարզի սահմանային հատվածներում այսօր առավոտյան տեղի ունեցած դեպքից հետո որոշակի լարվածություն պահպանվում է: Այդ մասին «Մեդիալաբին» ասաց Գեղամասար խոշորացված համայնքի ղեկավար Հակոբ Ավետյանը:
Հարցին, թե ինչպե՞ս է արտահայտվում լարվածությունը, Ավետյանը արձագանքեց.
«Դե, լարված վիճակը էն է, որ մաքսիմում միջոցները ձեռնարկվում են, որպեսզի հետ բերվեն տղաները, ինչն էլ լարվածություն է պահանջում: Կրակոցներ, հա, կան, բայց մեծ մասշտաբի չեն, որ վիրավորներ ունենանք»:
Հիշեցնենք՝ այսօր առավոտյան Պաշտպանության նախարարության հաղորդմամբ, Գեղարքունիքի մարզի սահմանային հատվածում, ՀՀ ԶՈՒ N զորամասի պահպանության տարածքում ինժեներական աշխատանքներ կատարելիս, ադրբեջանական զինված ուժերի զինծառայողների կողմից շրջափակվել և գերեվարվել է ՀՀ ԶՈՒ վեց զինծառայող։
Ավելի ուշ վարչապետի պաշտոնակատար Նիկոլ Փաշինյանը հայտարարեց, որ տեղի է ունեցել առևանգում:
Համայնքի ղեկավարն ինքը նույնպես հաստատեց, որ կատարվածն առևանգում է.
«Այո, առևանգում է, եկել են, ուղղակի առևանգել, գնացել: Բայց ես մանրամասներ չեմ կարող ասել, հարցը Պաշտպանության նախարարության տիրույթում է»: