ԵԿՄ նախկին նախագահ Մանվել Գրիգորյանին մեկուսարանում ԱԱԾ բարձրաստիճան պաշտոնյա է լուսանկարել: Այս մասին լրագրողներին ասել է ԱԱԾ տնօրեն Արթուր Վանեցյանը:
«Չեմ թաքցնի, որ լուսանկարն արել է մեր աշխատակիցը, որը բարձր պաշտոն է զբաղեցնում։ Նրա նկատմամբ ծառայողական քննություն է նշանակվել, որից հետո, եթե պարզվի, որ իր արարքը քրեորեն պատժելի է, նա կմեղադրվի, եթե քրեորեն պատժելի արարք չլինի, կհեռացվի աշխատանքից»,- ասել է Վանեցյանը:
Հիշեցնենք, որ armtimes.com-ը հրապարակել էր մեկուսարանում գտնվող Մանվել Գրիգորյանի լուսանկարը, որը քննադատության մեծ ալիք էր բարձրացրել։
Ավելի ուշ լրատվամիջոցը ներողություն է խնդրել և հեռացրել լուսանկարը։ «Մենք մեր աղբյուրը չենք բացահայտի, իհարկե, սակայն հուսով ենք՝ պատկան մարմինները կհայտնաբերեն և կպատժեն այդ լուսանկարի «հեղինակներին»։ Լուսանկարի հրապարակումը լրագրողական գայթակղություն էր մեր կողմից, որի համար կրկին ներողություն ենք խնդրում», – ասված է խմբագրության տարածած հայտարարությունում։