Այսօր ՀՀ կառավարությունը հավանություն տվեց Հայաստանի Հանրապետության և Վերականգնման վարկերի բանկի միջև Հայաստանում կենսաբազմազանության և կայուն տեղական զարգացման ծրագրի 23 մլն 208 հազար եվրոյի չափով (շուրջ 13 միլիարդ դրամ) դրամաշնորհային համաձայնագրի ստորագրման առաջարկությանը:
ՀՀ բնապահպանության նախարարի պաշտոնակատար Էրիկ Գրիգորյանը իր խոսքում նշեց, որ այս դրամաշնորհը բնապահպանության ոլորտում Հայաստանին հատկացված ամենախոշոր դրամաշնորհն է, և դրանում ներառված չէ վարկային որևէ կոմպոնենտ:
«Ծրագրի տևողությունը նախատեսվում է 8 տարի, կապահովի կենսաբազմազանությամբ հարուստ տարածքներում բնական ռեսուրսների պահպանությունն ու կայուն օգտագործումը»,- ասաց Էրիկ Գրիգորյանը։
8 տարի տեւողության դրամաշնորհային ծրագիրը ենթադրում է աշխատանքներ պահպանվող տարածքներում, անտառների կայուն կառավարում, բնական ռեսուրսների եւ բնական հուշարձանների բարելավում եւ կառավարում, ինչպես նաեւ ընտրված հարակից համայնքներում սոցիալ-տնտեսական զարգացման, էկոզբոսարջությունը խթանող միջոցառումներ։
