Այս ընթացքում, սակայն, Ռուբեն Ռուբինյանը, ընդհանուր առմամբ ներկայացնելով վերոնշյալ տրամաբանությունը, թույլ տվեց վրիպակներ և երկու անգամ հնչեցրեց միտք, որ արցախյան պատերազմը պակաս կարևոր էր, քան թավշյա հեղափոխությունը
Նոյեմբերի 29-ին «Դեմ առ դեմ» հաղորդման հյուրերն էին Հայաստանի հանրապետական կուսակցության փոխնախագահ Արմեն Աշոտյանն ու «Իմ քայլը» դաշինքի ներկայացուցիչ, փոխարտգործնախարար Ռուբեն Ռուբինյանը: Հեռուստաբանավեճի առանցքային թեմաներից մեկը «Իմ քայլը» դաշինքի անդամ Սասուն Միքայելյանի ոչ միանշանակ խոսքերն էին, որոնց շուրջ տեղի ունեցած քննարկման արդյունքում հնչած որոշ ձևակերպումներ մի քանի լրատվականներ ներկայացրեցին կոնտեքստից կտրված:
Մասնավորապես, Արմեն Աշոտյանը զրույցի ընթացքում մի քանի անգամ հիշատակեց Սասուն Միքայելյանի այն խոսքերը, թե թավշյա հեղափոխությունն ավելի կարևոր էր, քան արցախյան պատերազմը: Ինչպես հայտնի է, Միքայելյանի այս հայտարարությունից հետո և ինքը և դաշինքի առաջին համար Նիկոլ Փաշինյանըհանդես եկան հայտարարություններով և պարզաբանեցին, որ իրականում ձևակերպումը հաջող չէր և չէր արտացոլում քաղաքական ուժի իրական դիրքորոշումը:
Նույնը Աշոտյանի հետ զրույցում կրկնեց Ռուբին Ռուբինյանը՝ պատասխանելով Աշոտյանի՝ թեման շահարկելու համառ փորձերին: Ռուբինյանի տրամաբանությամբ, «Իմ քայլը» դաշինքը չի կարծում, որ արցախյան պատերազմն ավելի կարևոր է, քան թավշյա հեղափոխությունը, սակայն, միևնույն ժամանակ, համարում է, որ հեղափոխությունը կարևոր դեր ունի նաև Արցախի համատեքստում:
Այս ընթացքում, սակայն, Ռուբեն Ռուբինյանը, ընդհանուր առմամբ ներկայացնելով վերոնշյալ տրամաբանությունը, թույլ տվեց վրիպակներ և երկու անգամ հնչեցրեց միտք, որ արցախյան պատերազմը պակաս կարևոր էր, քան թավշյա հեղափոխությունը: «Այո, ես չեմ կարծում, որ արցախյան ազատամարտը ավելի կարևոր էր թավշյա հեղափոխությունից», — մասնավորապես, ասաց Ռուբինյանը:
Ու թեև կոնտեկստից պարզ էր դառնում, որ Ռուբինյանը հակառակն է նկատի ունեցել, սակայն հաղորդման մասին պատրաստված նյութերի գլխագրերում «Այսօր» կայքը և «Շանթ» հեռուստաընկերությունը օգտագործեցին հենց այս վերջին ձևակերպումները, որոնք կարող են թյուրըմբռնում առաջացնել ընթերցողի մոտ և չեն արտացոլում հաղորդման բուն տրամաբանությունը: