Սույն թվականի դեկտեմբերի 3-ին տեղի կունենա Վանո Սիրադեղյանի հոգեհանգստի, իսկ դեկտեմբերի 4-ին՝ հուղարկավորության արարողությունները:
Տեղեկությունը «Հայկական ժամանակ»-ին հայտնեց Բնակչության հատուկ սպասարկման ՀՈԱԿ-ի (Թաղման բյուրո) տնօրեն Վահե Խաչատրյանը, որը Սիրադեղյանի հուղարկավորման համար ձեւավորված կառավարական հանձնաժողովի անդամ է:
«Սիրադեղյանին հուղարկավորելու են իր հայրենի Կոթի գյուղում, իսկ հոգեհանգստի արարողությունը տեղի է ունենալու Ալեքսանդր Սպենդիարյանի անվան Օպերայի եւ բալետի ազգային ակադեմիական թատրոնում»,- ասաց Խաչատրյանը:
Վանո Սիրադեղյանի մահվան մասին հայտնի էր դարձել հոկտեմբերի 16-ի երեկոյան: Լուրը հաստատել էին նրա ընտանիքի անդամները՝ որդին՝ Խաչատուր Սիրադեղյանը և կինը՝ Ռուզան Տոնոյանը: Նա 75 տարեկան էր:
Ավելի վաղ Սիրադեղյանի ընտանիքին ՀՀ վարչապետ Նիկոլ Փաշինյանն էր այցելել, ցավակցություն հայտնել վերջինիս մահվան կապակցությամբ և իր զորակցությունը փոխանցել:
Հիշեցնենք նաեւ, որ, ՀՀ վարչապետի որոշմամբ, գրող, պետական գործիչ Վանո Սիրադեղյանի մահվան կապակցությամբ ստեղծվել է թաղման հանձնաժողով եւ հաստատվել դրա անհատական կազմը: Հանձնաժողովը ղեկավարում է վարչապետի աշխատակազմի ղեկավար Արայիկ Հարությունյանը:
