Փաշինյանն անդրադարձավ Հիսուս Քրիստոսի արձանը կառուցելու նախաձեռնությանը

ՀՀ վարչապետ Նիկոլ Փաշինյանը զարմանում է, որ Հայաստանում տեղադրված քրեական հեղինակությունների արձանները շատերը չեն նկատել, սակայն, երբ Հիսուս Քրիստոսի արձան կառուցելու մասին խոսակցություն եղավ, ակտիվացել են: «Արմենպրես»-ի հաղորդմամբ՝ Փաշինյանն այս մասին ասաց ԶԼՄ-ների և հասարակական կազմակերպությունների ներկայացուցիչների համար կազմակերպված առցանց ասուլիսի շրջանակում՝ անդրադառնալով Գագիկ Ծառուկյանի կողմից Հիսուս Քրիստոսի արձանը կառուցելու համար հայտարարած մրցույթին:

Հարցին, թե ճիշտ չէր լինի արդյոք այդ գումարն ուղղել ուրիշ ուղղությամբ՝ Փաշինյանը պատասխանեց. «Պետության մեջ հազարավոր նպատակներով գումարներ ծախսվում են: Օրինակ` կառավարությունը միջոցներ է հատկացրել, որ Չարենցավանի ճանապարհի մոտակայքում գտնվող Հավերժության ժապավենը վերականգնվի, նույն դեպքում էլ այդ հարցը կարելի էր տալ, թե արդյոք չարժե՞ր այդ գումարն ուրիշ նպատակով ծախսել: Միշտ էլ ցանկացած գումար ծախսելու դեպքում կարելի է հարց տալ՝ իսկ չարժե՞ր այլ նպատակով ծախսել, քանի որ երկրի կառավարումը մի տողից չէ բաղկացած: Պետական բյուջեում հազարավոր տողեր կան, որոնք բոլորն էլ կարևոր են»:

Ըստ նրա՝ Գագիկ Ծառուկյանի հայտարարությանը հետևած բանավեճը շատ կարևոր շերտեր է բացել, ինչն էլ լավ առիթ է՝ հանային ոլորտում առկա մի շարք խնդիրների վրա ուշադրություն հրավիրելու: Փաշինյանը նկատել է՝ օրինակ հիմա Հայաստանում ճանապարհների եզրերին տեղադրվում են հուշարձաններ, արձաններ կամ քարեր, հիմա նաև նոր միտում է նկատվում. տարբեր տեղերում խաչեր են հայտնվում: «Ընդ որում, այդ խաչերը երբեմն տեղադրվում են այնպես, հետագայում այնպիսի իրավիճակում են հայտնվում, որ իմ՝ որպես քրիստոնյայի զգացմունքները վիրավորում են. ով որտեղ հասնում, երկաթի երկու կտոր է գտնում, տանում ինչ-որ տեղ խաչ տեղադրում: Ամենայն հարգանքով բոլորին՝ մենք մայրուղիների մոտ տեսնում ենք, որ ինչ-որ քարեր են ի հայտ գալիս: Այս ամենը խոսում է պետական ինստիտուտների չկայացվածության մասին»,-ասաց Փաշինյանը:

Վարչապետը նշեց՝ Հայաստանում քրեական հեղինակությունների արձաններ կան տեղադրված: Եվ իր զարմանքն այն է, որ դա ոչ ոք չի նկատել: «Հիսուս Քրիստոսի արձանի մասին խոսակցություն եղավ, բոլորն ակտիվացան: Եվ կան շրջանակներ, որոնց թվում է, թե «Հիսուս Քրիստոս» անունը օգտագործելու սեփականության կադաստրով հաստատված վկայական կա, որ Հիսուս Քրիստոսի մասին հանկարծ ուրիշ ոչ ոք չխոսի, իրենք են լիազորված…»,-ասաց Փաշինյանը:

Կառավարությունում հիմա մշակվում է որոշակի իրավական կարգավորում, որ ընդհուպ մահարձանների չափերը պետք է տեղական ինքնակառավարման մարմինների ինստիտուցիոնալ թույլտվությամբ տեղի ունենա: «Եթե, օրինակ, ականավոր գիտնականի մահարձանն այնքան անշուք է, որ ոչ ոք չի նկատում, իսկ օրինակ «ռեկետյորի» և հանցագործի մահարձանը գերեզմանում այնքան մեծ է, որ հազարավոր երեխաներ մտնում, տեսնում են, որ ամենամեծ արձանը մարդասպանի արձանն է, հետո մենք հասկանում ենք, թե մեր հանրային հարաբերությունների վրա ինչ ազդեցություն է ունենում: Եթե հանցագործի համար 5 մետրանոց արձան դնեն, ոչ մեկ չի ասի, թե ինչ են անում»,-ասաց Փաշինյանը՝ հավելելով, որ այդ բոլոր հարցերը պետք է կարգավորվեն:

Նրա գնահատմամբ՝ շատ լավ է, որ Գագիկ Ծառուկյանը, ում մտքով նման բան է անցել, այդ գաղափարը ներկայացնում է հանրությանը: Ընդ որում, վարչապետի խոսքով, երբ որևէ քրեական հեղինակության համար ցանկանում են ճանապարհի եզրին մահարձան դնել, ոչ մեկ չի հարցնում բնակավայրի բնակիչներին, ՏԻՄ-ը, Ոստիկանությունն էլ չեն հարցնում:

«Ըստ էության, առաջարկվում է նախագիծ: Կլինի այդ արձանը, թե չի լինի, խոսքը պատկանում է պետությանը: Պետությունն ազդվում է իհարկե նաև հանրության տեսակետներից, կարծիքներից: Բայց կա օրենք, կան կառավարության որոշումներ, և երբ այդ նախագիծը սահմանված կարգով կներկայացվի՝ այդ թվում մասնագիտական քննարկման, ՀՀ-ում պետություն կա, և պետությունը սահմանված ընթացակարգերով որոշում կկայացնի: Այո, մասնավոր անձը և կազմակերպությունը կարող է առաջարկով հանդես գալ, և ոչ մասնավոր անձինք և այլ կազմակերպություններ կարող են դեմ կամ կողմ լինել, բայց ի վերջո որոշումները կայացվում են պետական ընթացակարգով: Շատ հնարավոր է, որ նախագիծը ներկայացվի համապատասխան հիմնավորումներով, և կառավարական համապատասխան օղակները որոշեն, որ դա լավ նախագիծ է և հնարավոր է՝ որոշեն, որ դա վատ նախագիծ է: Ես ուզում եմ, որ այս բոլոր խոսակցությունները տեղավորենք պետական ընթացակարգերի տիրույթում»,-ասաց Փաշինյանը: