Հայաստանին անհրաժեշտ հացահատիկի պահանջարկը լրացնելու մեխանիզմներ կգտնվեն. ՀՀ Էկոնոմիկայի փոխնախարար

ՀՀ էկոնոմիկայի նախարարի տեղակալ Արման Խոջոյանը ֆեյսբուքյան իր էջում գրել է․ «Հայաստանի ցորենի ցանքատարածությունները 2021 թ. կազմել են 58 967 հա, որից աշնանացան ցորեն՝ 57 288, գարնանացան՝ 1 679 հա։

Կառավարությունը սուբսիդավորել է աշնանացան սերմացուի գնի 30%, որի բերքահավաքն ակնկալվում է 2022 թ. երրորդ եռամսյակում։  

2021 թ. ներմուծվել է շուրջ 275 000 տոննա ցորեն, իսկ Հայաստանում ցորենի արտադրությունը կազմել է 97 000 տ։ Ներմուծումն իրականացվում է ՌԴ-ից։  

2021 թ. ՌԴ ցորենի արտադրությունը կազմել է 76 մլն տոննա, որից արտահանվում է շուրջ 25-30 մլն տոննան։

ՌԴ ինքնաբավության մակարդակը կազմում է 130-140%:   Այսօր առավոտյան հեռախոսազրույց ունեցա ՌԴ գյուղատնտեսության փոխնախարարի հետ, որը հավաստիացրեց, որ ՌԴ հնարավոր սահմանափակումները միտված են սահմանափակելու ռե-էքսպորտը, հետևաբար ցանկացած սահմանափակման դեպքում Հայաստանին անհրաժեշտ պահանջարկը լրացնելու մեխանիզմներ կգտնվեն։  

2021 թ. աշնանը ՌԴ-ում ամբողջությամբ իրականացվել է ցորենի ցանքը, որն ակնկալում է անփոփոխ բերք 2022 թ.։ Արևածաղկի սերմացուի պահանջարկը նույնպես բավարարված է, և նախատեսվող արտադրական քանակների նվազում ՌԴ-ում չի կանխատեսվում։  

Ամբողջ աշխարհում ակնհայտ պահանջարկ է ձևավորվում գյուղատնտեսական ապրանքների նկատմամբ, հետևաբար պետք է հնարավորինս շատ արտադրել, մշակել հողատարածքները՝ շուկայում մեր դիրքերն ամրապնդելու նպատակով»։