Հայաստանը և Բոլիվիան տոնում են երկկողմ դիվանագիտական հարաբերությունների հաստատման 30-ամյակը: Ինչպես հաղորդում է «Արմենպրես»-ը՝ Հայաստանի Հանրապետության և Բոլիվիայի Բազմազգ Պետության միջև դիվանագիտական հարաբերությունները հաստատվել են ուղիղ 30 տարի առաջ՝ 1992 թ. հուլիսի 27-ին:
Հարավային Ամերիկայում տեղակայված այս երկիրը՝ Բոլիվիան, որն անկախացել է դեռևս 1825 թվականին, աշխարհում հայտնի է իր եզակի և յուրահատուկ տեսարժան վայրերով: Մասնավորապես՝ այս երկրում է աշխարհի ամենաբարձրադիր մայրաքաղաքը՝ Լա Պասը, որը ծովի մակերևույթից 3869 մետր բարձրության վրա է, այստեղ են գտնվում նաև աշխարհի ամենահայտնի աղի լիճը՝ Ույունին, և աշխարհի ամենավտանգավոր ճանապարհը: Բացի այդ, Բոլիվիան կիսում է Պերուի հետ աշխարհի ամենաշատ քաղցրահամ ջրերի պաշար ունեցող լեռնային լիճը՝ հանրահայտ Տիտիկական:
Սակայն լատինաամերիկյան հեռավոր այս երկրի հետ Հայաստանի հարաբերությունները շատ զարգացած չեն: Բոլիվիայում Հայաստանի դիվանագիտական առաքելությունն իրականացվում է Բրազիլիայում ՀՀ դեսպանության միջոցով: Ըստ ՀՀ ԱԳՆ-ի տեղեկատվական բազայի՝ 2021 թ. հուլիսից Բրազիլիայի Դաշնային Հանրապետությունում Հայաստանի Հանրապետության դեսպանությունը համատեղության կարգով հավատարմագրվում է նաև Բոլիվիայի Բազմազգ Պետությունում (նստավայրը՝ ք. Բրազիլիա): 2022 թ. փետրվարից Բոլիվիայում գործում է Հայաստանի պատվավոր հյուպատոսի գրասենյակը:
Երկկողմ այցերի պատմությունը հարուստ չէ: 2018 թ. հուլիսին աշխատանքային այցով Բոլիվիա է այցելել ՀՀ արտաքին գործերի նախարարի տեղակալ Աշոտ Հովակիմյանը:
