ԱԺ Իմ քայլը խմբակցության պատգամավոր Նիկոլայ Բաղդասարյանը ֆեյսբուքյան ուղիղ եթերի միջոցով պարզաբանում է ներկայացրել ՍԴ դատավոր Վահե Գրիգորյանի հայտարարության վերաբերյալ:
Նրա խոսքով՝ ՀՀ նախկին Սահմանադրությամբ մենք ընտրում էինք Սահմանադրական դատարանի անդամ, իսկ նոր Սահմանադրությունն ընդունելիս սահմանվել է, որ ՍԴ-ում այլևս անդամ չի լինելու, լինելու է դատավոր: Եվ այդ ընթացակարգով ընտրվեց մեկ դատավոր՝ Դիլանյանը, իսկ այսօր ընտրվեց Վահե Գրիգորյանը:
Դա նշանակում է, որ գործող Սահմանադրության համաձան՝ այս պահին ՍԴ անդամները, այդ թվում՝ նախագահ Հրայր Թովմասյանը, Սահմանադրության ընդունման պահից ի վեր իրավունք չունեին ՍԴ-ում աշխատելու:
Ըստ նրա՝ երկու լուծում կար այնտեղ՝ կամ Սահմանադրությունը նախատեսում է անցումային դրույթներում, որ անդամները հետայսու համարվելու են դատավորներ, կամ մյուս տարբերակը, որ իրենք պետք է նույն ընթացակարգով նշանակվեն հաջորդաբար: Բայց քանի որ անցումային դրույթներով դա նախատեսված չէ, հետևաբար, մնում է մեկ լուծում՝ ՍԴ դատավորների թեկնածուներին արդեն հաջորդաբար կառավարությունը պետք է ներկայացնի:
«Այսինքն՝ կառավարությունը պետք է ողջամիտ ժակետում ներկայացնի իր թեկնածուներին: Եվ իր թեկնածուները կհամալրեն ՍԴ դատավորի անդամներին, մենք այլևս քվորումի խնդիր չենք ունենա: Կարծում եմ՝ մենք զարգացումները պետք է տանենք դրան: Եթե չեմ սխալվում դա հաջորդ նիստով է լուծվելու, և մենք աշնանն արդեն կունենանք ՍԴ դատավորի թեկնածուներ»,- ասաց նա:
Նիկոլայ Բաղդասարյանը նաև հայտարարեց, որ ՍԴ նախագահ Հրայր Թովմասյանն ըստ գործող Սահամանադրության չի հանդիսանում ՍԴ դատավոր, ունի անդամի կարգավիճակ: Հետևաբար Թովմասյանը չի կարող լինել ՍԴ նախագահ: