Արտակարգ իրավիճակների նախարարության Ճգնաժամային կառավարման պետական ակադեմիայի Մշակույթի կենտրոնը «Կրթություն խաղի միջոցով» ձևաչափով «Աղետիկը ամանորին» խորագիրը կրող ուսուցողական-երաժշտական ներկայացմամբ շնորհավորել է պրոֆեսոր Ռ․ Հ․ Յոլյանի անվան արյունաբանական կենտրոնում բուժում ստացող և Երևանի «Զատիկ» աջակցության կենտրոնի երեխաներին:
Ինչպես տեղեկացրին ՀՀ արտակարգ իրավիճակների նախարարությունից, «Աղետիկը ամանորին» բեմադրությունը ուշադրություն է հրավիրում Ամանորի «վազքին» բնորոշ ռիսկերին և հորդորում զգույշ լինել տոնածառը զարդարելիս, լույսերի հետ խաղալիս, և սովորեցնում է Ամանորի խորհրդանիշը հանդիսացող տոնածառի հրդեհային անվտանգության կանոններ։
Ըստ սցենարի՝ Կայծակը, Փոթորիկն ու Աղետիկը, որոնք հրավիրված չեն տոնական հավաքույթին, որոշում են խոչընդոտել Ձմեռ պապի գալուստին և անբարենպաստ եղանակ ստեղծում նրանց ճանապարհին։
Մոլորվածներին օգնության է հասնում փրկարարը։ Երեք չարագործները հայտնվում են զնդանում, սակայն, ի վերջո, հանդիսատեսը ներում է նրանց, քանի որ Ամանորը բարություն է խորհրդանշում։
Ըստ աղբյուրի՝ ներկայացման վերջում Ձմեռ պապը և փոքրիկ դերասանները երեխաներին բաժանել են ամանորյա նվերներ, որոնք պատրաստել է արտակարգ իրավիճակների նախարարությունը: Երեխաներին անձամբ շնորհավորել և նվերներ են հանձնել ԱԻ փոխնախարար Դավիթ Համբարյանը և ԱԻ նախարարի խորհրդական Արմեն Սարգսյանը։
Նշվում է, որ ներկայացման ավարտին կենտրոնի տնօրենը կրկնել է «Աղետիկի» պատգամը՝ հեռու մնալ վտանգներից: Երեխաների հարց ու պատասխանից պարզվել է, որ վտանգի դեպքում պետք է զանգահարեն 911։
