Ինֆորմացիայի ազատության կենտրոնի տնօրեն Շուշան Դոյդոյանը Ֆեյսբուք սոցիալական ցանցում գրել է.
«Կառավարության վերջնանպատակը պետական ռեգիստրի ամբողջական ազատականացումն է, և ԶԼՄ-ների համար պետռեգիստրից տեղեկատվություն ստանալն անվճար դարձնելը ողջ գործընթացի առաջին քայլն է միայն։
Այսօր այս հավաստիացումն ստացա ՀՀ Արդարադատության փոխնախարար Աննա Վարդապետյանից մեր հանդիպման ընթացքում։ Սա լիովին կհամապատասխանի Տեղեկատվության ազատության կարգավորումներին և չափանիշներին։
Այս պահին լրագրողական հանրության համար առկախ են մնում նաև հետևյալ հարցերը.
1. Պետռեգիստրի ամբողջական ազատականացման մասին կառավարությունը պետք է հանդես գա հրապարակային խոսքով, որպեսզի հասարակության համար պարզ և ընկալելի լինեն կառավարության բարեփոխումներն այս ոլորտում։
2. ԶԼ օրենքով տալ սպառիչ և ժամանակակից սահմանում՝ ինչ է ԶԼՄ-ն և ով է լրագրողը։
3. Հրաժարվել ԶԼՄ-ների հաշվառման (գրանցման) գաղափարից»։