ԳԱԱ Սևանի հարցերով հանձնաժողովի նախագահ Յուրի Ջավադյանն այսօր Ազգային ժողովում կազմակերպված լսումների ժամանակ մանրամասնեց, թե ինչ աշխատանքներ են տարվում Սևանա լճի վիճակի բարելավման ուղղությամբ:
Ըստ նրա՝ վարչապետի կողմից հանձնարարություններ են տրվել, ներկայումս իրենք Շրջակա միջավայրի նախարարության հետ համատեղ աշխատանքներ են իրականացնում:
«Լուրջ միջոցառումներ ենք ձեռնարկում, ափամերձ հատվածում 300 մշտական գործող օբյեկտներից արդեն 10-ում փորձնական տեղադրել ենք այն փորձնական նմուշները, որոնք ջուրը մաքրում են, բիոլոգիական մաքրում է կատարվում: Եվ ուրախալի է, որ դրանց շուրջ ջրի որևէ ծաղկում չի կատարվել»,- ասաց նա:
Մասնագետի խոսքով՝ նաև աշխատանքներ են տարվում ջրի տակ անցած մոտ 700 հա անտանռների կոճղերը հանելու ուղղությամբ:
«Այս բոլոր միջոցառումներն անելուց հետո մենք մի շատ կարևոր միջոցառում ենք նաև ուզում անենք, վարչապետն արդեն ընդունել է առաջարկությունը, ֆինանասավորումը գրեթե կա: Նախատեսում ենք կառուցենք 2-2.5 տարվա մեջ 3-4 դոնոր ջրամբարներ կառուցել, որպեսզի ջուրը բերենք լցնենք Սևանա լիճ: Դա շատ կարևոր է, քանի որ մաքուր ջուր կլցվի լիճ»,- նշեց մասնագետը:
Նա ասաց, որ լիճն այս վիճակի է հասել, քանի որ Գեղարքունիքի մարզում չեն գործում կեղտաջրերի մաքրման կայանները, չկա աղբահանության կազմակերպված համակարգ: Ջրահավաք ավազանի ամբողջ աղբը տարիներ շարունակ կցվել է ջուրը: Մյուս կողմից էլ նախկին իշխանությունների օրոք թերի են մաքրվել ջրի տակ անցած ափամերձ անտառները: Դրա հետևանքով ՝մոտ 700 հա անտառների կոճղեր հայտնվել են ջրի տակ:
