ՌԴ պաշտպանության նախարար Սերգեյ Շոյգուն հայտարարել է, որ երկրում զինված խռովության փորձը չի ազդել Ուկրաինայում ռազմական գործողությունների գոտում ռուս զինվորականների առաջադրանքների կատարման վրա։ «Արմենպրես»-ն այս մասին տեղեկանում է «Интерфакс» գործակալությունից։
«Սադրանքը չի ազդել զորքերի խմբավորումների գործողությունների վրա։ Զինծառայողները խիզախորեն և անձնուրացաբար շարունակել են լուծել իրենց առջև դրված խնդիրները», – ասել է Շոյգուն հուլիսի 3-ին տեղի ունեցած նիստի ժամանակ։
ՌԴ ՊՆ ղեկավարի խոսքով՝ հունիսի 23-25-ին «Ռուսաստանում իրավիճակն ապակայունացնելու փորձը» ձախողվել է «առաջին հերթին այն պատճառով, որ Զինված ուժերի անձնակազմը հավատարմություն է դրսևորել իրենց երդման և զինվորական պարտքի նկատմամբ»։
Հունիսի 23-ի երեկոյան «Վագներ» մասնավոր ռազմական ընկերության հիմնադիր Եվգենի Պրիգոժինը հայտարարել էր, թե իր ստորաբաժանումներն, իբր, հարձակման են ենթարկվել, և դրա համար մեղադրել էր Ռուսաստանի Դաշնության ռազմական ղեկավարությանը։ ՌԴ ՊՆ-ն այս տեղեկությունը որակել էր կեղծ։ Վագներ»-ի ստորաբաժանումները, որոնք աջակցում էին Պրիգոժինին, մտել էին Դոնի Ռոստով, այնուհետև՝ շարժվել դեպի Մոսկվա: Ավելի ուշ Բելառուսի նախագահ Ալեքսանդր Լուկաշենկոյի միջնորդությամբ Պրիգոժինը դադարեցրել էր առաջխաղացումը։