Ադրբեջանում մեկնարկել է Լաչինի միջանցքից առևանգված Վագիֆ Խաչատրյանի ապօրինի դատավարությունը։ Այս մասին հայտնում է Factor.am-ը։
Ադրբեջանական լրատվամիջոցները հայտնում են, որ Յասամալի շրջանային դատարանի վարչական շենքում ընթանում է նախապատրաստական դատական նիստը՝ Բաքվի ռազմական դատարանի դատավոր Ջամալ Ռամազանովի նախագահությամբ։
Նշվում է, որ նիստին ճշգրտվելու են Խաչատրյանի և շինծու գործով, իբր, «59 տուժողների» անձնական տվյալները։ Հիշեցնենք, որ Կարմիր Խաչի միջազգային կոմիտեի ուղեկցությամբ հուլիսի 29-ին բուժման նպատակով Արցախից Հայաստան տեղափոխվող Վագիֆ Խաչատրյանն առևանգվել էր Ադրբեջանի կողմից Լաչինի միջանցքի ապօրինի անցակետում։ Այնուհետև Բաքուն շինծու մեղադրանքներ է առաջադրել՝ Խաչատրյանին մեղադրելով «զանգվածային սպանությունների մեջ»։