Առողջապահության նախարար Արսեն Թորոսյանն այսօր կատարել է առաջին այցը «Շտապբուժօգնության» ՓԲԸ կայան և ծանոթացել Երևանի շտապօգնության մատուցած ծառայությունների որակին:
Նախարարը շրջայց է կատարել տարածքում` նախ ծանոթացել է մեքենաների հագեցվածությանը, ապա այցելել է զանգերի կենտրոն, որտեղ անձամբ հետևել է ընթացքին, թե ինչպես են աշխատակիցները պատասխանում քաղաքացիների զանգերին:
Արսեն Թորոսյանն անձամբ շտապօգնության տնօրենին ներկայացրել է այն բողոքներն ու ահազանգերը, որոնք ստանում է առողջապահության նախարարությունը, բացի այդ խոսել է շտապօգնության արդիականացմանն ուղղված քայլերի մասին:
«Ինչպես գիտեք, կառավարության որոշմամբ հավելյալ բյուջետային միջոցներ տրամադրվեցին առողջապահության նախարարությանը: Դրա 500 միլիոն դրամը ուղղված է շտապօգնության բժշկական ծառայությանը` 15 բրիգադի ավելացմանը Երևանում և 14 բրիգադի ավելացմանը մարզերում: Այդ ամենը բերելու է արագ կանչերին, թե հասանելիության, թե որակի բարձրացման առումով: Շտապօգնության բժշկական ծառայությունը համարվում է և համարվելու է բոլորի համար անվճար` այստեղ որևէ բան փոխելու մտադրություն չկա և չի լինելու»,- ասել է Թորոսյանը:
Նախարարը խոսել է նաև ամբողջ երկրի համար միասնական «Շտապ օգնության» զանգերի կենտրոնի ստեղծման մասին, որն իրենից ենթադրում է զանգերն ու կանչերը վերահասցեագրելու մարզային հիվանդանոցներ: Հատուկ շեշտվել է, որ գաղափարի ուղղությամբ արդեն իսկ աշխատանքներ են տարվում և դրա իրականացման համար ֆինանսական մեծ ներդրումներ չեն պահանջվի:
Այս մասին տեղեկացնում է պաշտոնական հաղորդագրությունը:
