ՀՀ Մարդու իրավունքների պաշտպան Անահիտ Մանասյանն անդրադարձել է ապրիլի 23-ին Տավուշի մարզում տեղի ունեցած միջադեպին, երբ հավաքի ժամանակ ավտոմեքենան փորձել է մխրճվել բազմության մեջ, ինչի հետևանքով բնակիչներից մեկը վնասվածք է ստացել։ Մարդու իրավունքների պաշտպանը շեշտեց, որ բռնության ցանկացած դեպք անթույլատրելի է:
«Արմենպրես»-ի փոխանցմամբ՝ նա ընդգծեց՝ տարածել են հայտարարություն և ընդգծել, որ բռնության կիրառումը որևէ դերակատարի կողմից անթույլատրելի է:
«Պահանջել ենք այդ հարցի հետ կապված պատշաճ քննության իրականացում: Մենք շատ արագ ենք արձագանքել ու զրուցել ենք բոլոր քաղաքացիների հետ, որոնք նաև ազատությունից են զրկվել: Մեզ համար կարևոր է նրանցից ստանալ պատշաճ տեղեկատվություն իրենց հետ տեղի ունեցած դեպքերի առնչությամբ: Եղել է քաղաքացի, որը մարմնական վնասվածքներ է ստացել և տեղափոխվել է հիվանդանոց: Այցելել ենք հիվանդանոց: Քաղաքացու հետ հանդիպման մասին տեղեկատվություն չեմ կարող փոխանցել։ Նրա հետ զրույցի արդյունքում տեղեկատվությունն ամփոփվելու է, և գալու ենք վերջնական եզրակացության»,-ասաց Մանասյանը:
Խոսելով քաղաքագետ Սուրեն Պետրոսյանի ձերբակալության մասին՝ ՄԻՊ-ը տեղեկացրեց՝ արդեն հանդիպել են Պետրոսյանին, արձանագրել են նրա բարձրաձայնած բոլոր խնդիրները:
«Իմ աշխատակիցներին հանձնարարել եմ, որ ի սկզբանե ազատությունից զրկման վայրում նրանց հետ հանդիպումից հետո կոնկրետ ժամը լրանալու պահին մեկնեն ոստիկանական բաժանմունք, որպեսզի կարողանանք երաշխավորել քաղաքացիների՝ պատշաճ ժամանակահատվածում ազատ արձակումը: Բոլորը, բացի Սուրեն Պետրոսյանից, ազատ են արձակվել: Եթե ես չեմ սխալվում, նրա դեպքում կա քրեական հանցակազմի հետ կապված տեղեկատվություն: Այս պահին չեմ կարող տեղեկատվություն փոխանցել, որովհետև մենք չենք իրավասու մարմինը: Բանավոր հաղորդակցություն ենք վարել իրավասու մարմինների հետ: Իմ հանձնարարությամբ մեր խումբը դեռ Տավուշում է: Այս պահին էլ հստակ գործողություններ ենք իրականացնում»,-հավաստիացրեց ՄԻՊ-ը:
