Կրթության, գիտության, մշակույթի ու սպորտի նախարար Արայիկ Հարությունյանն այսօր լրագրողների հետ զրույցում անդրադարձավ հարցին, թե Հայոց եկեղեցու պատմություն առարկան չի լինելում, այն մատուցվելու է ինտերգրված կամ այլ բովանդակությամբ:
«Այս ինֆորմացիան, որը երեկ հայտնվել է մամուլում, եղել է իմ տեղակալ Արևիկ Անափիոսյանի հարցազրույցի արդյունքում, որտեղ ինքն ասել է, որ մշակվում են չափորոշիչներ, առարկաների ցանկեր և յուրաքանչյուր առարկայի առանձին գոյության արդյունավետությունը, նպատակներն ենք քննարկում, և թե մենք ինչ ենք ուզում վերջնական արդյունքում ստանալ: Չափորոշիչներն ու առարկացանկերը մշակող հանձնաժողովն աշխատում է»,- նշեց Արայիկ Հարությունյանը:
Լրագրողները հետաքրքրվեցին՝ հանդիպե՞լ է կաթողիկոսի հետ, քննարկե՞լ են այդ հարցը: Արայիկ Հարությունյանը պատասխանեց, որ պարբերաբար հանդիպումներ ունենում են և կաթողիկոսի, և եկեղեցու ներկայացուցիչների հետ, այս առարկայի հարցը քննարկում են:
«Երբ որ առարկայացանկերի առաջարկներ կլինեն, մենք ևս մեկ անգամ նրանց հետ կքննարկենք: Եվ ձեզ խնդրում եմ սրանից սենսացիաներ չանեք»,- ասաց նա: