Այսօր, Աստանայում ԵԱՀԿ գագաթնաժողովի շրջանակներում ելույթ ունենալով` ՀՀ նախագահ Սերժ Սարգսյանն հայտարարել է, որ Ադրբեջանի կողմից ռազմական ագրեսիան վերսկսելու դեպքում, Հայաստանը չի ունենա այլ ընտրություն, քան Լեռնային Ղարաբաղի հանրապետությունը ճանաչելը:
«Հայաստանը կտրականապես չի ընդունում Լեռնային Ղարաբաղում ռազմական գործողությունների վերսկսման տարբերակը: Ադրբեջանի կողմից ռազմական ագրեսիան վերսկսելու դեպքում Հայաստանը չի ունենա այլ ընտրություն, քան ճանաչել Լեռնային Ղարաբաղի Հանրապետությունը դե յուրե և իր բոլոր հնարավորությունները ներդնել Արցախի ժողովրդի անվտանգության ապահովման համար»,-ըստ ՀՀ նախագահի պաշտոնական կայքէջի հաղորդագրության, ասել է Սերժ Սարգսյանը:
Նա շեշտել է, որ Ադրբեջանի փորձերը ուժի սպառնալիքով կորզելու միակողմանի զիջումներ ոչ միայն ի սկզբանե դատապարտված են ձախողման, այլև շարունակում են մնալ փոխզիջումային տարբերակով խնդրի կարգավորման հիմնական խոչընդոտը:
«Իսկ վերջին մեկ շաբաթվա մեջ ես կրկին համոզվեցի, որ այս փուլում Ադրբեջանը հետաքրքրված չէ Լեռնային Ղարաբաղի պրոբլեմի լուծմամբ: Նրա միակ նպատակը Հայաստանին առավելագույն վնաս հասցնելն է»,-ասել է Սերժ Սարգսյանը` հավելելով, որ Ադրբեջանը չունի Լեռնային Ղարաբաղի նկատմամբ հավակնությունների ո́չ իրավական, ո́չ քաղաքական և ո́չ էլ բարոյական հիմք:
Հիշեցնենք, որ երեկ` Սարգսյան-Ալիեւ հանդիպումը ԵԱՀԿ գագաթնաժողովի շրջանակներում չի կայացել: Ադրբեջանի նախագահը վերջին պահին հրաժարվել է հանդիպումից, իսկ իր ելույթում հայտարարել է, թե Հայաստանը փորձում է «իմաստազրկել խաղաղ բանակցային գործընթացը »:
© Medialab.am
