Ղարաբաղում այսօր ցմահ ազատազրկման է դատապարտվել ԼՂՀ ՊԲ դիրքերից մեկում նոյեմբերի 19-ին տեղի ունեցած չորս զինվորների սպանության եւ երեք զինվորների վիրավորելու գործով մեղադրվող զինծառայող Մանվել Հազրոյանը:
Առաջնային գծում տեղի ունեցած մահվան ելքով միջադեպի պատճառը, ըստ պաշտոնական վարկածի, զինվորների միջեւ ծագած վեճն էր:
Ինչպես տեղեկացնում է «Ազատություն» ռ/կ-ն, ավելի վաղ դատավարության ընթացքում միջադեպի վկաներից մեկի տված ցուցմունքի համաձայն` առաջնագծում հերթապահության ժամանակ կտվել էր համածառայողներից մեկի ականջակալների լարը, նա էլ ծանր հայհոյանքներ էր տեղացել ականջակալների լարը կտրողի հասցեին:
Ըստ այդմ, դեպքից մի քանի ժամ անց Մանվել Հազրոյանը իրեն էր վերագրել այդ հայհոյանքը եւ իրականացրել այդ սպանությունները: Ըստ «Ազատություն» ռ/կ-ի Հազրոյանն այսօր խոստովանել է մեղքը:
20-ամյա Մանվել Հազրոյանը ծնունդով Հայաստանի Արմավիրի մարզի Նալբանդյան գյուղից է: Այս դատական գործով նախագահողն էր Հայաստանի Սյունիքի մարզի ընդհանուր իրավասությունների առաջին ատյանի դատարանի դատավոր Համլետ Դավթյանը:
Հազրոյանի հայրը ավելի վաղ մամուլում հայտարարել էր, որ ոչ միայն չի հավատում այն բանին, որ իր որդին մարդ է սպանել, այլեւս, որ ընդունել էր իր մեղքը:
Հիշեցնենք, որ ըստ պաշտոնական վարկածի, Հազրոյանը իր մեղքը խոստովանել էր դեռ այն ժամանակ, երբ միջադեպից հետո տեղափոխվել էր Ստեփանակերտի զինվորական հոսպիտալ:
Ղարաբաղից Երեւան վերադառնալուց հետո Մանվել Հազրոյանի հայրը`Արմեն Հազրոյանը մամուլով հայտարարել էր, որ մերժում է նախաքննական մարմնի առաջադրած մեղադրանքը, քանի որ ինքը տեսել էր իր որդուն:
«Առաջին օրվանից մեղադրում են, ես իմ երեխային տեսել եմ, նա ի վիճակի չէր խոսել, հազիվ մի երկու բառ եմ խոսել հետը: Էդ ո՞նց եղավ, որ էդ վիճակում, անմիջապես մեղադրանքը ներկայացրեցին իրեն, ես չեմ պատկերացնում, թե ո/նց կարելի էր իրեն առաջին օրվանից մեղադրանք ներկայացնել կամ ասել, որ ինքն է արել: Նա չէր կարողանում երկու բառ խոսել…,- Lragir.am-ի հետ զրույցում հայտարարել էր Հազրոյանի հայրը:
Նա նաեւ տեղեկացրել էր, որ իրեն թույլ չեն տվել առանձին տեսակցել եւ խոսել որդու հետ, ում հսկում էին 7-8 զինվորներ:
© Medialab.am
