Երևանի նորընտիր քաղաքապետ Տիգրան Ավինյանը վստահեցնում է, որ իրենց քաղաքական ուժը՝ «Քաղաքացիական պայմանագիր»-ը որևէ կերպ չի ներազդել, որ ավագանու առաջին նիստին, որում պետք է քաղաքապետ ընտրեին, բավարար թվով անդամներ ներկայանային:
«Արմենպրես»-ի փոխանցմամբ՝ Ավինյանն այս մասին վստահեցրեց իր երդմնակալության արարողությունից հետո լրագրողների հետ ճեպազրույցում՝ անդրադառնալով դիտարկմանը՝ Ավինյանը քաղաքապետ է ընտրվել նաև նրա շնորհիվ, որ «Հանրային ձայն» խմբակցության անդամները մասնակցել են ավագանու առաջին նիստին, հիմա «Հանրային ձայն»-ի ընտրական ցուցակի առաջին համարի կինն ազատ է արձակվել, արդյոք դա՞ է խոստացվել մասնակցության դիմաց:
«Մենք առհասարակ նման առևտուրների մեջ չենք մտել և չենք պատրաստվում մտնել: Այն հարցերը, որոնք վերաբերում են քրեական դատավարություններին, քրեական հետապնդման մեջ գտնվող անձանց, չենք կարող առհասարակ առևտրի առարկա դարձնել, քանի որ առհասարակ այդ դաշտ չենք էլ մտնում»,-ասաց Ավինյանը:
Նա վստահեցրեց, որ այն, ինչ տեղի է ունենում դատական, իրավապահ համակարգում, տեղի է ունենում անկախ այն գործընթացներից, որոնք լինում են քաղաքական դաշտում և ավագանու նիստերում:
«Ավագանու նիստերին մասնակցել-չմասնակցելու հետ կապված տարբեր ուժեր իրենց դիրքորոշումները հայտնել են հանրայնորեն: Մենք այդտեղ որևէ կերպ ոչ ներազդել ենք, ոչ առևտուր ենք արել որևէ մեկի հետ: Հատուկ շեշտել ենք, որ կա ուժերի տեսակ, ում հետ մենք որևէ կերպ որևէ գաղափար չենք կիսում և իրենց հետ նույնիսկ քննարկելու բան էլ չունենք»,-ասաց Երևանի քաղաքապետը:
