Այսօր առավոտյան Չինարի գյուղ է այցելել ՀՀ զինդատախազ Գեւորգ Կոստանյանը` տեղում ծանոթանալու ադրբեջանական դիվերսիայից հետո տիրող իրադրությանը:
Լրագրողների հետ զրույցում նա նշել է, որ կատարվածը ցավալի էր ու անցանկալի է, սակայն` կանխատեսելի: «Կանխատեսելի էր այն առումով, որ, այնուամենայնիվ, մենք գտնվում ենք ռիսկային գոտում, եւ հարկավոր է ավելի զգաստ ու զգոն լինել, հատկապես` շփման գոտում»,- ասաց նա:
Դիտարկմանը, թե, ըստ զինդատախազի, սահմանին զգոնությունը պակաս է, Գեւորգ Կոստանյանը պատասխանել է. «Մենք զգոնության պակաս չունենք, մենք ունենք զգոնության ավելացման կարիք»:
Ինչ վերաբերում է վիրավորների առողջական վիճակին, նա նշել է, որ բոլորին տրամադրվել է անհրաժեշտ բուժօգնություն եւ նրանց կյանքին վտանգ չի սպառնում:
© Medialab.am