Գեղարքունիքի մարզի Վարդաձոր համայնքում ՀՀ կառավարության կողմից իրականացվող սուբվենցիոն ծրագրերի շրջանակներում այս տարվա ընթացքում վեց փողոցներում կկառուցվի ջրահեռացման համակարգ, կհիմնանորոգվեն կամ կվերակառուցվեն խմելու ջրատարի արտաքին եւ ներքին ցանցերը:
Գեղարքունիքի մարզպետարանի զարգացման ծրագրերի, զբոսաշրջության եւ վերլուծության բաժնի տվյալներով՝ ջրահեռացման համակարգի կառուցման ընդհանուր նախնական արժեքը կազմում է 12 միլիոն 694 հազար դրամ, որից 7 միլիոն 694 հազար դրամը հատկացնում է ՀՀ կառավարությունը, 5 միլիոն դրամը՝ Վարդաձորի համայնքապետարանը:
Խմելու ջրատարի արտաքին ու ներքին ցանցերի վերակառուցման եւ հիմնանորոգման ծրագրի ընդհանուր նախնական արժեքը կազմում է 27 միլիոն 845 հազար դրամ, որի 70 տոկոսը կամ 19 միլիոն 491 հազար դրամը հատկացնում է ՀՀ կառավարությունը, 30 տոկոսը կամ 8 միլիոն 353 հազար դրամը՝ Վարդաձորի համայնքապետարանը:
Վարդաձոր համայնքի ղեկավար Ռոբերտ Սիրականյանի տեղեկացմամբ՝ ջրահեռացման համակարգը կկառուցվի 772 մետր ընդհանուր երկարությամբ, երկաթյա կիսախողովակներով: Համայնքի խմելու ջրատարի արտաքին ցանցը կվերակառուցվի գլխամասային աղբյուրների մոտ, 1880 մետր երկարությամբ, ինչի արդյունքում կավելացվի համայնքին մատակարարվող ջրի քանակությունը:Կվերակառուցվի նաեւ օրվա կարգավորիչ ջրամբարից սնվող արտաքին ցանցը 374 գծամետր երկարությամբ, իսկ ներքին ցանցը կհիմնանորոգվի «Շահենի դար» կոչվող թաղամասում, 966 մետր երկարությամբ:
«Համայնքի համար շատ կարեւոր խնդիրներ են լուծվում: Վեց փողոցներում կառուցվող ջրահեռացման համակարգը միաժամանակ բարելավում է ոռոգման ջրի մատակարարումը: Իսկ խմելու ջրատարի արտաքին ու ներքին ցանցերի վերակառուցման ու հիմնանորոգման արդյունքում կբարելավվի նաեւ խմելու ջրի մատակարարումը: Ջրահեռացման համակարգի կառուցման մրցույթը հայտարարված է, իսկ երկրորդ ծրագրի մրցույթը կհայտարարվի առաջիկայում»,-ներկայացրեց համայնքի ղեկավարը:
Այս մասին հայտնում են ՀՀ Գեղարքունիքի մարզպետարանից։