Հայաստանի Հանրապետության մարզերի և համայնքների գրադարանավարներին մասնագիտական նոր հմտություններ և գիտելիքներ փոխանցելու նպատակով Խնկո Ապոր անվան ազգային մանկական գրադարանը հուլիսից մինչև սեպտեմբեր կկազմակերպվի «Գրադարանավարների վերապատրաստման դասընթացներ» ծրագիրը: Այն կիրականացվի ՀՀ մարզերի և համայնքների գրադարանների շուրջ 60 աշխատակցի համար:
«Արմենպրես»–ի հաղորդմամբ՝ նոր կորոնովիրուսի տարածման կանխարգելման և արտակարգ դրության սահմանափակումներով պայմանավորված՝ ծրագիրն իրականացվում է հեռավար ձևաչափով:
«Գրադարանավարների վերապատրաստման դասընթացներ» ծրագիրը մեկնարկել է հուլիսի 13-ին Շիրակի մարզային և համայնքային գրադարանների աշխատակիցների վերապատրաստումով: Հաջորդիվ՝ դասընթացներին կմասնակցեն Լոռու, Արմավիրի և մյուս մարզերի ու համայնքների գրադարանավարները: Դասընթացները վարում են հանրապետության փորձառու և առաջնակարգ մասնագետները: Ծրագրում ներառված են գրադարանային գործի բոլոր գործառույթների վերաբերյալ գիտելիքներ և գործնական հմտություններ՝ համապատասխան 12 թեմայով:
Ծրագրի նպատակներից է մարզերի և համայնքների գրադարանների գրադարանավարներին նորարարական փոխգործուն, ժամանակակից, համագործակցային գործելաոճի առանձնահատկություններին ծանոթացնելը:
Այն միտված է մարզերում գրադարանային գործի բարելավմանն ու զարգացմանը:
Խնկո Ապոր անվան ազգային մանկական գրադարանի տնօրեն Ռուզան Տոնոյանի խոսքով՝ վարպետության դասերին մասնակից գրադարանավարները վերապատրաստման դասընթացների ընթացքում ձեռք կբերեն գիտելիքներ, կտիրապետեն մասնագիտական հմտությունների կիրառման նոր գործիքակազմին և աշխատաոճին: «Դասընթացի մասնակիցները ստացած գիտելիքներն ու հմտությունները կփոխանցեն իրենց գործընկերներին՝ նպաստելով գրադարանային գործի զարգացմանն ու արդյունավետությանը»,- ակնկալվող արդյունքների մասին ասել է գրադարանի տնօրենը: Նախատեսվում է ծրագիրը դարձնել շարունակական՝ ներգրավելով բոլոր մարզերի և համայնքների գրադարանավարներին:
Դասընթացը կիրականացվի ՀՀ կրթության, գիտության, մշակույթի և սպորտի նախարարության աջակցությամբ:
