Մեզ վերջնահաշվարկ չի տրվել․ ՍԴ նախկին դատավոր Ալվինա Գյուլումյան․ Factor.am

Հեղինակ MediaLab

ՄԻԵԴ-ից առայժմ նորություն չկա։ Այդ մասին այսօր Factor.am-ի հետ զրույցում ասաց Սահմանադրական դատարանի նախկին դատավոր Ալվինա Գյուլումյանը, որը երկու նախկին դատավորներ Ֆելիքս Թոխյանի և Հրանտ Նազարյանի, ինչպես նաև՝ ՍԴ նախկին նախագահ Հրայր Թովմասյանի հետ դիմել էր Եվրոպական դատարան՝ խախտված իրավունքների վերականգնման համար։ Նրանք պնդում էին, որ սահմանադրական փոփոխությունների գործընթացը խախտումներով է եղել, և իրենք պայքարելու են։

Հարցին՝ դատավորի պաշտոնից ազատվելուց հետո աշխատավարձից բացի, իրեն և մյուս երկու նախկին դատավորներին տրվե՞լ է վերջնահաշվարկ և գույքի հանձնում-ընդունում եղե՞լ է՝ Գյուլումյանն ասաց․ «Ոչ, մեզ վերջնահաշվարկ չի տրվել։ Եթե լիներ՝ կասեինք»։ Հարցին՝ պատճառը որն է՝ նա ասաց, որ չգիտի՝ հավելելով․ «Ենթադրում եմ՝ չի եղել, որովհետև անհատական ակտ չկա։ Եթե լինի՝ կարծում եմ, որ նույն օրն էլ կարվի։ Բայց դրա համար անհրաժեշտ է դատարանի արձանագրային որոշում կամ նախագահի պարտականությունները կատարողի կարգադրություն, որը չկա այս պահի դրությամբ։ Նույնն էլ գույքի հանձնման մասով»։

Իսկ իմաստ տեսնո՞ւմ է պայքարը շարունակելու՝ կապված իրավունքների խախտման հետ, Գյուլումյանն ասաց․ «Եթե իմաստ չտեսնեի, չէի սկսի ոչ մի բան»։ Հիշեցնենք, որ հունիսի 26-ին ուժի մեջ մտան սահմանադրական փոփոխությունները, որոնց վերաբերող նախագիծը խորհրդարանում ընդունվել էր հունիսի 22-ին։ Ըստ այդմ՝ դադարեցվեցին Սահմանադրական դատարանում 12 տարուց ավելի պաշտոնավարած դատավորների լիազորությունները։