Ոսկեվազ համայնքի հուշարձանի տարածքում մետաղորսիչով գանձ են որոնել․ ՊՈԱԿ-ի պաշտոնյան կանխել է գանձագողության դեպքը

Հեղինակ MediaLab

«Պահպանության ծառայություն» ՊՈԱԿ-ի Արագածոտնի մարզային ծառայության պետ Մանուկ Մանուկյանը այսօր հուշարձանի տարածք հերթական շրջայցի ժամանակ կանխել է գանձախուզության ու գանձագողության հերթական դեպքը։

Մանուկյանը Ոսկեվազ համայնքում գտնվող «Ամրոցի համալիր Ախթամիր» հանրապետական նշանակության /մ.թ.ա. 3 հազ. 9-19 դդ. թվագրվող/ հուշարձանի տարածքում նկատել է «Նիվա» մակնիշի ավտոմեքենա և մոտենալով հուշարձանին տեսել է, որ մի տղամարդ մետաղորսիչով փորում է միջնաբերդի ներսում։

Երկրորդ անձնավորությունը «որոնողական» աշխատանք է իրականացրել քիչ հեռու։ Մանուկ Մանուկյանը ներկայացել է և պահանջել դադարեցնել՝ միաժամանակ տեղեկացրել, որ քաղաքացիների արարքը քրեորեն պատժելի է։

ՊՄՊ մարզային ծառայության պետն ահազանգել է «Պահպանության ծառայություն» ՊՈԱԿ, Արագածոտնի ոստիկանություն և ԱԱԾ։ Իրավապահները օպերատիվ են ահազանգել, գանձագողերն արդեն ոստիկանության բաժանմունքում են և բացատրություն են տալիս։

Այդ մասին տեղեկացնում են «Պահպանության ծառայություն» ՊՈԱԿ-ի լրատվական ծառայությունից։