Այս օրերին ՄԻՊ աշխատանքը եղել է հստակ, թիրախային, մեր նպատակն է եղել պարզել Ադրբեջանի իրականացրած հարձակումների և թուրքական հայտարարությունների տրամաբանությունը, որովհետև սա ուղիղ առնչություն ունի մարդու իրավունքների, առողջության իրավունքի և կատարվող ավերածությունների հետ։ Այդ մասին այսօր ճեպազրույցում հայտարարեց Մարդու իրավունքների պաշտպան Արման Թաթոյանը։
Ըստ պաշտպանի, այս փուլում չափազանց կարևոր է ցույց տալ այդ հարձակումների հիմքում ընկած քաղաքականության նենգ բնույթը։ «Այս դեպքում ակնհայտ է էթնիկ զտումների նպատակը և ահաբեկչական մեթոդներով քաղաքացիական բնակչության վրա հարձակումներ գործելու նպատակը», -ընդգծեց Պաշտպանը։
Ըստ Թաթոյանի, Ադրբեջանը սկսած սեպտեմբերի 27-ից հարձակումներ է իրականացնում միջազգային մարդասիրական իրավունքում արգելված զինատեսակներով։ Ձեռք բերված ապացույցները ուղարկվելու են միջազգային կառույցներին։ Ընդ որում, ըստ Արման Թաթոյանի, այդ զինատեսակներով հարվածներ են հասցվում խիտ բնակեցված տարածքներում։