Թուրքիայի նախագահ Ռեջեփ Թայիփ Էրդողանը հունիսի 14-ին Բրյուսելում հանդիպել է ԱՄՆ նախագահ Ջո Բայդենի հետ։ Միջազգային մամուլը լայնորեն արձագանքել է երկու նախագահների հանդիպմանը:
Այսպես, «Reuters»-ը նկատել է, որ Բայդենի՝ ԱՄՆ նախագահ դառնալուց հետո առաջին անգամ կայացած այս հանդիպումը թեև «դրական» մթնոլորտում է անցել, սակայն Թուրքիա-ԱՄՆ հարաբերություններում առկա խոշոր տարաձայնությունների հանգուցալուծման համար որևէ առաջընթաց չի ապահովել։
«The Wall Street Journal»-ն էլ նախագահների հանդիպումը բնութագրել է որպես «ՆԱՏՕ-ի երկու դաշնակիցների՝ Լիբրայից մինչև Սիրիա և Աֆղանստան անվտանգության շահերից բխող ընդհանուր հիմքերի որոնում և խաթարված հարաբերությունները վերականգնելու փորձ»։
«Al Jazeera»-ն մեջբերել է Էրդողանի այն խոսքերը, որ հանդիպումն անցել է արդյունավետ և անկեղծ մթնոլորտում և որ «երկկողմ հարաբերություններում անլուծելի խնդիրներ չկան»։
Աղբյուրը հիշեցրել է նաև, որ Էրդողանն ու Բայդենը միմյանց ճանաչում են արդեն երկար տարիներ, սակայն նրանց հարաբերություններում հաճախակի են խնդիրներ ծագում։
«Euronews»-ն էլ ընդգծել է հատկապես Էրդողանի այն հայտարարությունը, թե ԱՄՆ–Թուրքիա հարաբերություններում անլուծելի խնդիրներ չկան։
Աղբյուրը, սակայն, ուշադրություն է հրավիրել այն հանգամանքի վրա, որ թուրք–ամերիկյան լարվածության հիմնական պատճառներից մեկի՝ S-400 ՀՕՊ համակարգերի հետ կապված տարաձայնությունների լուծման առումով այս հանդիպումը առանձնապես հույսեր չի ներշնչում։
Այս մասին հայտնում է ermenihaber.-ը:
