«Երբ ընթերցում ես ԵԽԽՎ Հայաստանի հարցով համազեկուցողի հայտարարությունը, հասկանում ես, որ Հայաստանում կան ոլորտներ, որտեղ իշխանափոխություն չի եղել»:
Նման գրառում է կատարել ԱԳ նախարարի նախկին խոսնակ, Հայ ազգային կոնգրեսի արտաքին հարաբերությունների հանձնաժողովի նախագահ Վլադիմիր Կարապետյանը:
Նրա խոսքով, քիչ է այն, որ մի քանի պնդում կա բառացիորեն կրկնող ՀՀԿ-ականների խոսքերը (քաղաքապետի ընտրությունների, իբր, ցածր մասնակցության վերաբերյալ), այն նաև այնպիսի ականներ է պարունակում (ընտրությունների վերաբերյալ քաղաքական ուժերի կոնսենսուսի անհրաժեշտություն, ԸՕ բարեփոխումներից հետո Վենետիկի հանձնաժողովի նախընտրած մինչև 1 տարի ժամանակաշրջանը նոր ընտրություններին բոլոր ուժերին նախապատրաստվվելու համար և այլն), որ համոզվում ես, որ ԵԽԽՎ-ում ոչ մի աշխատանք չի տարվել հայկական իրողությունները բացատրելու, իշխանությունների քայլերը պարզաբանելու, նոր նախաձեռնությունները ներկայացնելու ուղղությամբ:
«Դրա փոխարեն աշխատել է ՀՀԿ-ն՝ իր օրակարգային առաջնայնությունները ամբողջությամբ և անխափան ներկայացնելով և առաջ մղելով: Սա ընդգծված միակողմանի փաստաթուղթ է և չի արտացոլում Հայաստանում ստեղծված քաղաքական իրողությունները: Հուսանք, որ նման իրավիճակներ չեն կրկնվի և մեր պատկան մարմինները կանեն իրենց գործը»,- գրել է Կարապետյանը:
