«Ես կհանդիպեմ Կարեն Ղազարյանի ծնողներին». Փաշինյան. «Ա1+»

«Ես կհանդիպեմ Կարեն Ղազարյանի ծնողներին». Փաշինյան. «Ա1+»
«Ես կհանդիպեմ Կարեն Ղազարյանի ծնողներին». Փաշինյան. «Ա1+»

Այսօր տեղի ունեցած մամլո ասուլիսում Հայաստանի վարչապետի պաշտոնակատար Նիկոլ Փաշինյանն անդրադարձել է Ադրբեջանում գերության մեջ գտնվող Բերդավան համայնքի բնակիչ Կարեն Ղազարյանի ընտանիքի անդամներին, որոնք վերջին օրերին բողոքի ակցիաներ են իրականացնում՝ փակելով դեպի Վրաստանի սահման տանող ավտոճանապարհը:

Փոխանցում է «Ա1+»-ը:

«Կարեն Ղազարյանի ծնողների դիմումը ստացել եմ, հանձնարարել եմ, որ այդ հանդիպումը կազմակերպեն: Կինս երկու անգամ այցելել է այդ ընտանիքին, երբեք էլ այդ հարցը մեր ուշադրությունից դուրս չի եղել: Սակայն նրանց ակցիան հարցեր առաջացրեց, թե ում դեմ էր ուղղված այն, եթե Ադրբեջանի իշխանությունների, ապա ինչո՞ւ է փակվում այդ ճանապարհը, որի փակումն ընդհանրապես Ադրբեջանի ռազմավարական նպատակներից մեկն էր: Եթե մեր դեմ էր ակցիան, թե ինչու բավարար ուշադրություն չենք դարձնում խնդրին, ապա հարց է ծագում, թե ինչու է այդ դեպքում վարչապետի կինը երկու անգամ այցելում նրանց: Եթե խոսքն այն մասին է, որ Հայաստանը պետք է ջանքեր գործադրի, ապա, այո, բայց արդյոք այդ գործընթացը պետք է համապատասխան լինի Հայաստանի շահերին: Սրանք հարցեր են, որոնք պարզ չեն: Նույն կարգավիճակում գտնվող տղա էլ ունենք Ադրբեջանում, ինչո՞ւ նրա համար ճանապարհներ չեն փակվում, որովհետև որբանոցի տղա՞ է, մենք ա՞յս տրամաբանությամբ ենք աշխատում»,- ասել է  Փաշինյանը:

Նա նշել է, որ հարգանքով է վերաբերվում Կարեն Ղազարյանի ծնողների անհանգստությանը, բայց հայ-վրացական ճանապարհը փակելն իր համար անհասկանալի է: «Որևէ մեկը մտածում է, որ ինչ-որ բան կարող էինք անել՝ չե՞նք արել. դա ճիշտ չէ: Ես կհանդիպեմ Կարեն Ղազարյանի ծնողներին և կխոսեմ անկեղծ մեր հայրենակիցների հետ»,- նշել է նա: