«Մեդիալաբի» հարցերին պատասխանել է Արցախի Հանրապետության նախագահի գլխավոր խորհրդական – հատուկ հանձնարարություններով դեսպան Ռուդիկ Հյուսնունցը
– Պարո՛ն Հյուսնունց, նախօրեին Արցախի նախագահը հայտարարեց, որ թշնամին Շուշիից 5 կմ հեռավորության վրա է, իսկ այսօր արդեն հայտնի դարձավ, որ հնարավոր է եղել հետ մղել հակառակորդին: Այս պահին ի՞նչ իրավիճակ է Շուշիում:
– Ես առավոտից մեր տղաների հետ եղել եմ այդ տեղամասում. այդ կիրճում հիմա ամեն ինչ մաքուր է: Նախագահի կոչից հետո նա հանձնարարել էր հատուկ գործողություններ, և մեր պաշտպանության բանակը դրանք փառքով իրականացրել է:
Մեր թիրախավորված հարվածներից թշնամու խումբը հարյուրավոր մարդկանցով և իրենց զինամթերքով ոչնչացվել է:
Գրեթե 2-3 ժամ զինամթերքը պայթում էր: Թիրախավորված, շատ կոնկրետ, նշանակետային հարվածներ են հասցվել, նախագահի հանձնարարականը կատարվել է բանակի կողմից, փառք մեր տղաներին:
Թուրք-ադրբեջանական հրոսակները ցաքուցրիվ են եղել: Դրանց մեջ և սևամորթներ կան, արաբներ կան, թուրքեր կան, այլ օտարազգիներ կան: Մասնավորապես, թուրքերը հատուկ պատրաստություն են ստացել ՆԱՏՕ-ի սպեցնազի կողմից:
Փաստորեն իրավիճակը փոխված է, այդ հրոսակների խմբերը, որոնք ողջ են մնացել, ցաքուցրիվ են եղել, մեր տղաները հիմա նրանց հետապնդում են, մաքրում տարածքը:
Ես այսօր եղել եմ Քարինտակում, հանդիպել եմ թե՛ վարչակազմի ղեկավարի՝ Լեռնիկ Հարությունյանի, թե՛ Շուշիի քաղաքապետի՝ Հովիկ Սարգսյանի հետ, աշխարհազորի տղաների հետ եմ հանդիպել:
Մենք մեր լեռների պես կանգուն ենք: Ես նույնիսկ նկար եմ տեղադրել Ֆեյսբուքում Քարինտակից և ասել եմ՝ մենք թե քարի տակ ենք, թե քարի գլուխը, Շուշի բերդաքաղաքում ենք մենք:
Անհո՛գ եղեք, և համայն հայության խնդիրն է այսօր ամեն ինչ անենք, որ մեր Շուշին՝ բիբլիական Արարատի պես սրբագործված այդ խորհրդանիշը, կարողանանք պահել:
Եթե մենք կորցրեցինք Շուշին, մենք կորցնելու ենք մեր տեսիլքը, որովհետև ամբողջ մեր ժողովուրդը մի օր պետք է Արարատի տեսիլքով հետ վերադարձնենք մեր Մասիս սարը: Շուշին պահպանելը ամբողջ հայության սրբազան պարտքն է:
– Արայիկ Հարությունյանի երեկվա կոչից հետո այստեղ հուսահատական տրամադրություններ եղան ոմանց մոտ: Նշվում է, որ այդ հայտարարությունը հուսահատեցնող էր: Դուք ի՞նչ եք կարծում այդ առնչությամբ:
– Ոչ թե հուսահատեցնող էր, այլ զգոնության կոչ էր, որովհետև նախագահի մարտական ոգին այնքան բարձր է, որ քաջալերում է բոլորիս՝ թե՛ զինվորներին, թե՛ սպաներին, գեներալներին:
Մենք նախագահի հետ միասին եղել ենք Հադրութում, հյուսիսային հատվածում: Զորքի առջևից գնացող նախագահը չի կարող հուսահատեցնող ձևով խոսել: Նա մարտունակ ոգի ունի և այդ ոգին փոխանցում է ժողովրդին, բանակին: Պարզապես նա զգոնության կոչ արեց, որ հավուր պատշաճի կազմակերպվենք և թշնամուն դիմակայենք:
– Նշվում է, որ Շուշիի գործողությունների ժամանակ թշնամին 100-200 զոհ է տվել:
Շատ զոհ են տվել, ես հիմա ստույգ թվերը չեմ կարող ներկայացնել, բայց այն, որ մենք թիրախավորված ոչնչացրել ենք նրանց կրակակետը, և նրանք վայ-վայ անելով փախել են, փաստ է:
– Շուշիի երեկվա գործողությունից հետո հնարավո՞ր է, որ լինի թշնամու կողմից երկրորդ, երրորդ հարձակումը, թե՞ այնպիսի ջախջախիչ պարտություն են կրել, որ հազիվ թե նման փորձ անեն:
– Ես կարող եմ ասել, որ մնացած տեղերում նրանց գործողությունները եղել են խաբուսիկ, որպեսզի այդ ուղղությամբ սուր մտնեին մեր մեջ: Սա եղել է ամենակարևոր գործողությունը:
Փաստ է, որ մի 2-3 օր նրանք ուշքի չեն գալու, բայց թշնամին աննահանջ գալիս է: Այնպես որ, սպասենք իրադարձություններին: Մենք գնալու տեղ չունենք: Մեզ համար սա հայրենիք է, նրանց համար՝ տարածք:
Դա մեր առավելությունն է, մենք այստեղից ոչ մի տեղ չենք գնալու: Ալիևի այսօրվա հոխորտանքներից մի որոշ ժամանակ հետո կտեսնեք նրա լացակումած, աղեկտուր ձայնը:
– Այսօր Զոհրաբ Մնացականյանը հանդիպել է ԵԱՀՄ Մինսկի խմբի համանախագահների հետ: Դուք այդ հանդիպումից ինչ-որ սպասելիքներ ունե՞ք:
– Դե, նրանք երեք անգամ հումանիտար հրադադար են հայտարարել, բայց դրանք չեն պահպանվել: Ալիևը Թուրքիայից հրահանգ է ստացել, ասել են՝ այո՛, դու ասա, թե համաձայն ենք հրադադարին, բայց շարունակիր գրոհները:
Նրանք շարժվում են Թուրքիայի հրամաններով՝ խախտելով հրադադարը, ռմբակոծելով թե հիվանդանոցները, թե եկեղեցիները, թե տները: Նրանք ոչ մի բանի առջև չեն կանգնում, և ես կարծում եմ, որ համանախագահներն այսօր կտրուկ քայլեր պետք է անեն, քաղաքական ու տնտեսական պատժամիջոցներ կիրառեն: Առանց դրա ադրբեջանական քաղաքականության ուղեգիծը չի փոխվելու:
Մանե Հարությունյան
MediaLab.am
