Հանդիպում ՀԿ-ների եւ Գյումրու քաղաքապետի միջեւ
-Ժողովուրդն ինձ պարտադրում է, կոկորդս բռնել է ու ասում է, որ պիտի առաջադրես քո թեկնածությունը,-Սերգեյ Նազարեթյանի հարցին, թե արդյո՞ք առաջադրելու է իր թեկնածությունը ՏԻՄ ընտրություններում, պատասխանեց Գյումրու քաղաքապետ Վարդան Ղուկասյանը:
Հուլիսի 18-ին տեղի ունեցավ հանդիպում Գյումրու քաղաքապետի եւ Գյումրիում գործող ՀԿ-ների միջեւ: «Նոր սերունդ» ՀԿ-ի նախագահ Սերգեյ Գաբրիելյանը նշում է, որ հանդիպման նախաձեռնությունը պատկանում է հասարակական կազմակերպություններին, ինչը հնարավորություն կտա խնդիրները, առաջարկությունները, նաեւ կառուցողական դիտողություններ ներկայացնել քաղաքապետին եւ համատեղ պայքարել խնդիրների լուծման համար:
Ներկայացվեցին տարաբնույթ խնդիրներ` Գյումրու տարբեր փողոցների լուսավորությանը, ասֆալտապատմանը վերաբերող, նաեւ մանկատան երեխաների հետ կապված հարցեր:
«Երեխաների հասարակություն. մանկապատանեկան ձեռնարկումների աջակցություն կենտրոն» ՀԿ-ի նախագահ Արա Սուքիասյանը անդրադարձավ հասարակության մեջ այսօր տիրող ընդհանուր բարոյահոգեբանական մթնոլորտին եւ դպրոցականների միջեւ դպրոցներից դուրս տեղի ունեցող վեճ-կռիվներին.
-Դուք, Ձեր պաշտոնավարության առաջին տարին ամփոփելիս իրավացիորեն նշում էիք քաղաքում հաստատված անդորրի, պատերի տակ ու անկյուններում թաղային հեղինակությունների կքանստած հենակետերի բացակայությունը: Այսօր, աննկատելիորեն, վերականգնվել է լարված մթնոլորտը, լինում են վեճեր, կռիվներ եւ այս ամենը կարիք ունի վերահսկելու:
Խնդիրների շարքում Ա.Սուքիասյանն մտահոգություն հայտնեց երեկոյան ուշ ժամերին` 21:00/22:00-ից հետո փողոցում թափառող դեռահասների մասին եւ առաջարկեց Կրասնոդարի երկրամասի օրինակով սահմանել մինչեւ 18 տարեկանների զբոսանքի` երեկոյան ժամերին փողոցում, առանց ծնողի ուղեկցությամբ, գտնվելու թույլատրելի ժամանչափ մինչեւ ժամը 21:00-ն: Սրան ի պատասխան քաղաքապետը նշեց.
-Համեմատում եք Կրասնոդարի հետ, սակայն այնտեղ հանցագործությունները հիսունապատիկ, հարյուրապատիկ ավելի շատ են: Իսկ Գյումրին շատ հանգիստ քաղաք է, ցավոք սրտի, այսօր ուզում են քաղաքը այլ ձեւով բնութագրեն, բայց մեր քաղաքը այսօր շատ լավ վիճակի մեջ է, թաղերն իրար հետ շատ համերաշխ են:
Միաժամանակ քաղաքապետը խորհուրդ տվեց թաղային հեղինակություններին թշնամաբար չնայել:
-Թաղային հեղինակություն ասելով ի՞նչ ենք հասկանում` որ մարդը լավ տղա է: Այդտեղ էլ կա լավ ու վատ` մեկը աշխատում է բարու համար, մյուսը` չարի:
ՀԿ-ների ներկայացուցիչների կողմից անդրադարձ կատարվեց նաեւ երթուղայինների սպասարկման եւ վարորդների վարվեցողության հետ կապված խնդիրներին: Այս հարցին ի պատասխան քաղաքապետը նշեց, որ միկրոավտոբուսներում փակցրած են համապատասխան հեռախոսահամարներ` դժգոհություններ ունենալու դեպքում ահազանգելու համար, եւ հավելեց, որ ամիսներով նմանատիպ զանգեր չեն եղել: «Գյումրու առաջընթաց» ՀԿ-ի ղեկավար Հասմիկ Մխիթարյանը օրինակ բերեց, որ ինքը անձամբ 30 րոպե սպասել է 50 համարի երթուղայինին, քաղաքպետն էլ ասաց, որ համամիտ չէ. ՙՑերեկվա ժամերին անհնարին բան է 30 րոպե սպասել: Ժամացույցը, երեւի, չի աշխատել՚:
Վ.Ղուկասյանը խոսեց նաեւ կատարված ասֆալտապատման աշխատանքների մասին.
-«Հանրապետական» կուսակցությունը այդքան փողոցներն ասֆալտապատում է, իսկ մնացած կուսակցություններին, որ այդքան ձայներ են տվել, թող հիմա նրանց էլ ասեն` գումարներ տվեք, որ մեր քաղաքը կառուցապատենք: Ես ինչքան կարողացա` բերեցի:
Չնայած «Հանրապետական» կուսակցության աշխատանքները մատնանշելուն` քաղաքապետն, թերեւս ի միջի այլոց, ասաց նաեւ, որ հոգեպես կուսակցական չէ, հոգեպես քրիստոնյա է եւ հայ: Եւ երբեմն իրեն մեղադրում են, որ քաղաքապետը շատ է պահանջում իր քաղաքի համար: Նա չշրջանցեց Վարդանանց քարե գորգի թեման.
-Երեք անգամ ավելի էժան ենք կառուցել, քան Երեւանինը: Ես իմ աշխատանքից գոհ եմ, բայց էս սատանեքը դժգոհ են: Այս գորգը ոչ միայն Գյումրու, այլեւ ողջ Շիրակի դաշտավայրի համար է: Ուրիշ ելք չկա, մի բան պիտի կպցնեն, թող կպցնեն:
Ալիսա Հակոբյան
Նյութն արտատպվում է www.asparez.am կայքի թույլտվությամբ: