ՀՀ կառավարության այսօրվա նիստում հավանության են արժանացել «Տեղեկատվական տեխնոլոգիաների ոլորտի պետական աջակցության մասին» օրենքի նախագիծը, ինչպես նաև «Շահութահարկի մասին» և «Եկամտային հարկի մասին» օրենքներում լրացումներ կատարելու նախագծերը: Ինչպես նիստից հետո ՀՀ կառավարության մամուլի կենտրոնում կայացած ասուլիսում նշել է ՀՀ էկոնոմիկայի նախարար Վահրամ Ավանեսյանը, օրինագծերով կարգավորվում են ՏՏ ոլորտի պետական աջակցության հիմնական սկզբունքները: Ըստ այդմ, ՏՏ […]
ՀՀ կառավարության այսօրվա նիստում հավանության են արժանացել «Տեղեկատվական տեխնոլոգիաների ոլորտի պետական աջակցության մասին» օրենքի նախագիծը, ինչպես նաև «Շահութահարկի մասին» և «Եկամտային հարկի մասին» օրենքներում լրացումներ կատարելու նախագծերը:
Ինչպես նիստից հետո ՀՀ կառավարության մամուլի կենտրոնում կայացած ասուլիսում նշել է ՀՀ էկոնոմիկայի նախարար Վահրամ Ավանեսյանը, օրինագծերով կարգավորվում են ՏՏ ոլորտի պետական աջակցության հիմնական սկզբունքները:
Ըստ այդմ, ՏՏ ոլորտին նախատեսվում է տրամադրել մի շարք արտոնություններ, մասնավորապես, օրենքով սահմանված կարգով հավաստագրված կազմակերպությունների համար շահութահարկի 0% դրույքաչափի, ինչպես նաև եկամտային հարկի 10% դրույքաչափի կիրառում` անկախ ամսական հարկվող եկամտի չափից:
Նախարարի խոսքով` նշված արտոնությունների կիրառումն էապես կնպաստի ոլորտում սկսնակ ընկերությունների ձևավորմանը, նոր աշխատատեղերի ստեղծմանը, տարածաշրջանում Հայաստանի ՏՏ ոլորտի մրցունակության և երկրի վարկանիշի բարձրացմանը:
Վ.Ավանեսյանի դիտարկմամբ` Հայաստանի ՏՏ ոլորտում դինամիկ աճ է արձանագարվում. 2008-2012թթ. ընթացքում ոլորտում գրանցվել է մոտ 23 տոկոս միջին տարեկան աճ:
Չնայած դրան, հետազոտություններն ու ուսումնասիրությունները ցույց են տալիս, որ ՏՏ ոլորտում մրցունակության առումով Հայաստանն արդեն զգալիորեն սկսել է զիջել տարածաշրջանի երկրներին, որոնք նշանակալի արտոնություններ են տրամադրում ոլորտին:«Մենք ակնկալում ենք, որ այս նախաձեռնությունը հնարավորություն կտա, որպեսզի Հայաստանի Հանրապետությունում առաջիկա 3-5 տարիների ընթացքում 40-60 սկսնակ ձեռնարկություններ իրենց գործունեությունը ծավալեն »,-ասել է նախարարը:
Այս մասին տեղեկացնում է ՀՀ կառավարության մամլո հաղորդագրությունը:
© Medialab.am