Թորոսյանը և նրա տեղակալը այցելել են Գեղարքունիքի մարզի բուժկենտրոններ․ Մարտունիում որոշվել է մեծացնել կորոնավիրուսային հիվանդությանը սպասարկող բաժանմունքը

Հեղինակ MediaLab

Առողջապահության նախարար Արսեն Թորոսյանը և նրա տեղակալ Արտյոմ Սմբատյանն այցելել են Գեղարքունիքի մարզ, շրջել բժշկական կենտրոններով և ծանոթացել վիրավոր զինվորների, ինչպես նաև կորոնավիրուսային հիվանդություն ունեցող պացիենտների բուժման ընթացքին։ Այդ մասին տեղեկացնում են Առողջապահության նախարարությունից։

Շրջայցի ընթացքում նախարարը հետաքրքրվել է բժշկական կենտրոնների կարիքներով, ծանոթացել ծանր վիճակում գտնվող վիրավորների բուժման ընթացքին։

Նախարարը նախ այցելել է Վարդենիսի բժշկական կենտրոն և զինվորական հոսպիտալ, տեղում ծանոթացել ծառայությունների կազմակերպմանը և համոզվել, որ կատարվում են անհրաժեշտ բոլոր բուժական միջամտությունները։ Այնուհետև Արսեն Թորոսյանը եղել է Մարտունու բժշկական կենտրոնում, որտեղ ծավալված են և՛ վիրավորների և՛ կորոնավիրուսային հիվանդություն ունեցող պացիենտների բաժանմունքներ։

Տեղում որոշում է կայացվել մեծացնել կորոնավիրուսային հիվանդությանը սպասարկող բաժանմունքը։ Նախարարը ծանոթացել է նաև Մարտունու բժշկական կենտրոնի նոր շենքի կառուցման շինարարական աշխատանքներին, որը չնայած պատերազմական իրավիճակին, ընթանում է լայն տեմպերով։ Գավառի բժշկական կենտրոն այցի ընթացքում որոշում է կայացվել բացել կորոնավիրուսային հիվանդությանը սպասարկող բաժանմունք, որի շուրջ արդեն իսկ սկսվել են ինտենսիվ աշխատանքներ։

Իսկ Սևանի բժշկական կենտրոնում խնդիր է դրվել մեծացնելու բաժանմունքի հագեցվածությունը, որպեսզի հնարավոր լինի ավելի շատ պացիենտների սպասարկել։ Նախարարը շնորհակալություն է հայտնել թե զինվորներին՝ հայրենիքը կյանքի գնով պաշտպանելու և թե բուժանձնակազմերին՝ թիկունքում պայքարելու և կյանքեր փրկելու համար։