«Ադրբեջան» գրությամբ վարորդական իրավունքը սխալմունքի արդյունք էր. խնդիրն արդեն լուծված է (լուսանկար)

Համացանցում ակտիվորեն մի վարորդական իրավունքի լուսանկար է շրջանառվում, որում որպես ծննդավայր գրված է Ադրբեջան։ Տեղեկություն տարածողները նշում են, թե Ոստիկանությունը GPS-ով է որոշել ծննդյան վայրը, որի համաձայն Տավուշի Պառավաքար գյուղն արդեն համարվում է Ադրբեջան։

«Տեղեկատվության ստուգման կենտրոնը» կապ հաստատեց Տավուշի մարզպետարանի հետ, որտեղից պարզաբանեցին եղելությունը։

«Քաղաքացու վարորդականում  սկզբում սխալմամբ նշվել է Ադրբեջան։ Նույն օրը խնդիրն արձանագրվել է ու փոխվել քաղաքացու վարորդական իրավունքը` որպես ծննդյավայր նշվել է Հայաստան։

Պառավաքար համայնքը ինչպես նախկինում, այնպես էլ հիմա համարվում է Հայաստանի Հանրապետության տարածք»-պարզաբանեցին մարզպետարանից։

Մենք կապ հաստատեցինք նաև վարորդականի տիրոջ հետ, ով նշեց, որ գաղափար չունի, թե իր վարորդականի լուսանկարը ինչպես է հայտնվել համացանցում։

«Իմ վարորդականի հետ ամեն ինչ արդեն նորմալ է։ Խնդիր չկա, ամեն տեղ գրված է Հայաստան, Armenia»։

Կից տեղադրում ենք քաղաքացու վարորդական իրավունքի լուսանկարը։

Այս մասին հայտնում է Տեղեկատվության ստուգման կենտրոնը։